Bir neçə gündür "Wolt" şirkətinin 1200-dən çox kuryeri şirkətin yeni qaydalarına etiraz əlaməti olaraq boykot edirlər. Onların bir qismi bu gün Caspian PlatForumda mətbuat konfransı keçirdilər.

Əsas dəyişikliklərdən biri şirkətin onlara iki sifariş götürəndə birinin pulunu təklif etməkləri olub. Məsələn, kuryer Gənclikdən Elmlərə sifariş aparırsa, yolüstü Statistika komitəsinə də sifariş çatdırırsa, əvvəllər hər iki sifariş üçün kuryerə pul ödənilirmiş. İndi hər iki sifarişə görə şirkət müştəridən pul alsa da, onlardan birini kuryerə verirlərmiş ki, onsuz da bu yolu gedirsən, "yolüstü bunu da ver də".

Kuryerlərin ikinci tələbləri tariflərin azaldılması, üçüncü tələbləri isə tanınmış "Waze", yaxud "Google Maps" proqramlarınndan istifadə edilməsidir. Bu tələbi birinci dəfə eşidəndə öz-özümə "nə fərqi var proqramın" düşünmüşdüm. Ancaq kuryerlər izah edirlər ki, şirkətin indi istifadə etdiyi xəritə proqramı ilə digər tanınmış proqramlar arasında kilometrlərlə fərq yaranır, bu da onların gəlirlərini azaldır.

Hər bir halda şirkətin kuryerlərinin yarıdan çoxu, 1200 nəfər aktiv boykota qoşulubsa, bunu təqdir etmək lazımdır. İctimaiyyət də, "Wolt" müştəriləri də bu etiraza dəstək verməlidirlər. Şirkət müştəridən sifarişə görə pul alırsa, bunu həyatını riskə atan, əziyyət çəkən kuryerə vermirsə, bu qaydaların dəyişməsi üçün kuryerlərə dəstək verməliyik.



Bəxtiyar Hacıyev