Jurnalist Şahnaz Bəylərqızının həbsindən apellyasiya şikayəti verilib. Bunu vəkili Bəxtiyar Hacıyev bildirib.

O, bu gün - fevralın 7-də 1 saylı Bakı İstintaq Təcridxanasında Ş.Bəylərqızı ilə görüşüb. Vəkilin sözlərinə görə, sağlamlıq problemləri ilə əlaqədar jurnalist tibbi müşahidəyə götürülüb.

O habelə vurğulayıb ki, jurnalistin tibbi müayinəsi aparılıb, şəkərli diabetin səviyyəsini ölçmək üçün qan nümunələri götürülüb, ona evdən dərmanlar gətiriblər.

Bu məlumatı Penitensiar Xidmətdən dəqiqləşdirmək mümkün olmayıb.

Jurnalistlər Şahnaz Bəylərqızı və Şəmşad Ağa həbs olundular.

Fevralın 6-da Xətai rayon Məhkəməsinin qərarı ilə jurnalist Şahnaz Bəylərqızı (Hüseynova) həbs edilib.

Verilən qərarla istintaq qurumunun (Daxili İşlər Nazirliyi) təqdimatı təmin olunub, Ş.Bəylərqızı barəsində 3 ay 15 gün müddətində həbs-qətimkan tədbiri seçilib.

Vəkil Bəxtiyar Hacıyevin verdiyi məlumata görə, hazırkı iş ToplumTV üzrə cinayət işindən yanvarın 21-də ayrı icraata ayrılıb: "Şahnaz Bəylərqızına qarşı Cinayət Məcəlləsinin həmin icraatda nəzərdə tutulan 162-1.1-ci (Əmək müqaviləsi hüquqi qüvvəyə minmədən işçilərin hər hansı işlərin yerinə yetirilməsinə cəlb edilməsi), 192.3.2-ci (xüsusilə külli miqdarda gəlir əldə etməklə qanunsuz sahibkarlıq), 193-1.3.1-ci (Cinayət yolu ilə əldə edilmiş əmlakı leqallaşdırma), 193-1.3.2-ci (...xeyli miqdarda törədildikdə), 206.4-cü (mütəşəkkil dəstə tərəfindən qaçaqmalçılıq) və 213.2.1-ci (vergiləri ödəməkdən yayınma - mütəşəkkil dəstə tərəfindən törədildikdə) maddələri ilə ittihamlar irəli sürülüb".

Həmin maddələrlə şəxsə 12 ilə qədər həbs cəzası verilə bilər.

Şahnaz Bəylərqızı özünü təqsirli bilmir.

"Şahnaz Bəylərqızı özünü təqsirli bilmir, həbsin səbəblərinin ona aydın olmadığını bildirdi". Bunu vəkil Bəxtiyar Hacıyev deyib.

Vəkilin sözlərinə görə, prosesdə ev dustaqlığı ilə bağlı vəsatət verilib, amma məhkəmə bu vəsatəti təmin etməyib. Məhkəmə qərarından apellyasiya şikayəti veriləcək.

Məhkəmə iclasından əvvəl də vəkil Xətai rayon Polis İdarəsinin Müvəqqəti Saxlama Təcridxanasında Bəylərqızı ilə görüşüb.

"Şahnaz Bəylərqızının səhhəti yaxşı deyil. Onun diabeti və yüksək qan şəkəri, yüksək qan təzyiqi var. İstintaq tədbiri zamanı onun təzyiqi anidən 200-ə qalxıb, "təcili yardım" çağırılıb. İndi onun qan təzyiqi 140-150-dən aşağı düşmür", - vəkil prosesdən öncə "Turan"a bildirib.

Öz növbəsində, jurnalistin həyat yoldaşı da deyib ki, o, hipertoniya, şəkərli diabetin kəskin forması, ürək-damar xəstəliyindən əziyyət çəkir: "Bundan başqa, onun başında kist var".

Jurnalistin yetkinlik yaşına çatmamış iki övladı var.