Həbsdə olan “AbzasMedia” jurnalistləri Sevinc Vaqifqızı, Nərgiz Absalamova və Elnarə Qasımovanın 2025-ci il iyulun 2-dən etibarən aclıq aksiyasına başladığı bildirilir. Bu barədə onların ailə üzvləri məlumat yayıb.

Jurnalistlərin aclıq aksiyasına başlama səbəbi təşkilatın rəhbəri Ülvi Həsənliyə dəstək göstərməkdir. Məlumata görə, saxlanıldıqları 1 saylı Bakı İstintaq Təcridxanasında onlar qeyri-insani rəftara və işgəncəyə məruz qalıblar. Yaxınlarının sözlərinə görə, Sevinc Vaqifqızı və Elnarə Qasımova aclıq etdiklərini və zorakılığa məruz qaldıqlarını telefon vasitəsilə ailələrinə bildirdikləri zaman danışıqlar qəfil dayandırılıb.

Ailələrin verdiyi məlumata əsasən, aclıq aksiyasına başladıqdan sonra jurnalistlər təkadamlıq kameralara köçürülüb, şəxsi əşyaları isə zorla əllərindən alınıb. Onların vəziyyəti ilə bağlı narahatlıq artır.

Bundan öncə, iyunun 26-da Ülvi Həsənli, Hafiz Babalı, Fərid Mehralızadə və Məhəmməd Kekalov Bakı İstintaq Təcridxanasından Umbakı Penitensiar Kompleksinə köçürülmüşdü. Ülvi Həsənli buna etiraz olaraq aclıq aksiyasına başlamış və artıq 8 gündür qida qəbul etmir. Məlumata görə, o, cərimə kamerasına salınıb və ailəsi ilə görüş hüququndan məhrum edilib. Həyat yoldaşı və azyaşlı qızı ilə görüşünə icazə verilmədiyi bildirilib.

İyulun 1-də “AbzasMedia” rəhbərliyinin yaydığı bəyanatda Prezident İlham Əliyev, Ədliyyə naziri Fərid Əhmədov, Baş prokuror Kamran Əliyev və Ombudsman Səbinə Əliyeva məsələyə dərhal müdaxilə etməyə çağırılıb.

Xatırladaq ki, 2023-cü ilin noyabrında “AbzasMedia” rəhbərliyi və əməkdaşları saxlanılmışdı. 2025-ci il iyunun 20-də Bakı Ağır Cinayətlər Məhkəməsinin hökmü ilə Ülvi Həsənli, Sevinc Vaqifqızı, Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, Məhəmməd Kekalov isə 7 il 6 ay müddətinə azadlıqdan məhrum edilmişdi.

Həbs olunan jurnalistlər barələrində irəli sürülən ittihamları rədd edir və onların korrupsiya araşdırmalarına görə siyasi sifarişlə həbs olunduqlarını bildirirlər. Yerli və beynəlxalq hüquq müdafiə təşkilatları da bu həbslərin siyasi motivli olduğunu bəyan edərək jurnalistlərin dərhal azad olunmasına çağırır.