Bu gün, 21 iyul 2025-ci il tarixində “Demokratik Azərbaycan Seç” (DAS) təşkilatının yaranmasının 7 ili tamam olur. Təşkilat 2018-ci ildə Almaniyanın Bochum şəhərində təsis edilib və ötən illər ərzində Azərbaycan cəmiyyətində demokratik dəyərlərin təşviqi, insan hüquqlarının müdafiəsi və vətəndaş cəmiyyətinin gücləndirilməsi istiqamətində aktiv fəaliyyət göstərir.

DAS təşkilatı həm Almaniyada yaşayan azərbaycanlı siyasi mühacirlər, həm də Azərbaycandakı hüquq müdafiəçiləri ilə sıx əməkdaşlıq quraraq, demokratik islahatlar və şəffaf seçkilər tələbi ilə beynəlxalq platformalarda da səsini çatdırmağa çalışıb.

Təşkilatın təsisçiləri bildirirlər ki, DAS yalnız bir siyasi təşkilatı deyil, həm də demokratik dəyişikliklərə inanan insanların bir araya gəldiyi platformadır. Onlar gələcək illərdə fəaliyyətlərini daha da genişləndirməyi, xüsusilə gənclərin maarifləndirilməsi və azad medianın dəstəklənməsi istiqamətində yeni layihələr həyata keçirməyi planlaşdırırlar.

7 illik yubiley münasibətilə təşkilatın üzvləri və tərəfdarları bu gün onlayn tədbir təşkil edərək həm görülən işləri qiymətləndirib, həm də gələcək fəaliyyət istiqamətləri ilə bağlı müzakirələr aparılıb.

Qeyd edək ki, DAS təşkilatı 2018-ci ildən bəri azadlıq, ədalət və demokratiya prinsiplərinə sadiqliyi ilə seçilən və Almaniyada tanınan ilk siyasi və ictimai qurumlardan biri kimi tanınır.

Bu illər ərzində təşkilat yarandığı gündən onun üzvləri Almaniyanın müxtəlif şəhərlərində 100-dan artıq siyasi aksiya, yəni kütləvi mitinq təşkil etmişdir.