“Meydan TV işi” üzrə həbs olunan “Arqument.az” saytının baş redaktoru Şəmşad Ağa Apellyasiya Məhkəməsində çıxış edib. O, çıxışında barəsindəki ittihamların əsassız və siyasi sifarişlə irəli sürüldüyünü bildirib və məhkəmə sistemini kəskin tənqid edib.

Jurnalistin sözlərinə görə, 24 iyun 2024-cü il tarixində Xətai Rayon Məhkəməsi həbs müddətini uzatsa da, ortada heç bir maddi sübut yoxdur:

“Qaçaqmalçılıq ittihamı ilə bağlı sübut təqdim olunmayıb. Hakim Rəfail Sadıqov sadəcə siyasi qərarı yerinə yetirdi.”

Şəmşad Ağa çıxışında Azərbaycanın məhkəmə sistemini “siyasi hakimiyyətin repressiya aləti” adlandırıb və məhkəmələrdə ədalət gözləmədiyini bildirib:

“Mən Azərbaycan məhkəmələrindən ədalətli qərar gözləyəcək qədər sadəlövh deyiləm, sadəcə tarix üçün danışıram.”

“Sputnik Azərbaycan”ın adını çəkdi

Jurnalist diqqəti həbsinin ictimaiyyətə ilk dəfə “Sputnik Azərbaycan” tərəfindən elan olunmasına yönəldib. O, bu media orqanını Kremlin region siyasətini tənqid edən media qurumlarına qarşı kampaniya aparmaqda ittiham edib:

“Rusiya 30-dan çox ölkədə qadağan olunmuş bu propaqanda vasitəsi ilə bizi anti-Rusiya mövqeyinə görə hədəf göstərdi.”

Ağa bildirib ki, həmin dövrdə Rusiya Təhlükəsizlik Xidmətinin rəhbəri Sergey Narışkin Bakıda olub və bu səfərdən sonra Azərbaycanda qərbyönümlü media və təşkilatlara qarşı repressiyalar gücləndirilib:

“Narışkin Moskvaya qayıdandan sonra dedi ki, Azərbaycanda qərbyönümlü media və təşkilatlara qarşı birgə hərəkət etməyə razılaşıblar.”

“Media haqqında” Qanuna və “Reyestr” sisteminə qarşı çıxış

Jurnalist ölkədə tətbiq olunan yeni media qanunvericiliyini “beyət alma sistemi” adlandırıb və bu sistemin yalnız faşist İtaliyasında Mussolini dövründə tətbiq edildiyini bildirib. O, qeyri-reyestrdə olan jurnalistlərin təqib olunduğunu vurğulayıb.

“Həqiqətləri yazdığımız üçün buradayıq”

Şəmşad Ağa çıxışının sonunda həbsinin səbəbinin hakimiyyətin korrupsiya və qanunsuzluqları haqqında yazıları olduğunu deyib: “Paytaxtda insanlar körpü altında suda boğulur, yol gedərkən yerə batır və günlərlə axtarılır. Biz bu problemləri yazdıq deyə həbs olunmuşuq.”

Prezident İlham Əliyevi siyasi məsuliyyət daşımaqda ittiham edən jurnalist, sonda söz və ifadə azadlığına, müstəqil medianın yaşaması üçün mübarizənin vacibliyinə çağırış edib.