İyulun 22-də Bakı Ağır Cinayətlər Məhkəməsində ictimai fəal Nicad İbrahim barəsində hökm elan edilib. Məhkəmə onu Cinayət Məcəlləsinin 126.2.4-cü maddəsi (ümumi təhlükəli üsulla, xuliqanlıq niyyəti ilə qəsdən sağlamlığa ağır zərər vurma) ilə təqsirli bilərək 6 il 6 ay müddətinə azadlıqdan məhrum edib.

İttihama görə, Nicad İbrahim Bəhmən Əliyev adlı şəxsi bıçaqlayıb. Lakin ictimai fəal məhkəmədə son sözündə təqsirsiz olduğunu bəyan edib və ittihamları rədd edib. O, bildirib ki, bu hadisə uydurmadır və ona qarşı siyasi motivli təqib aparılır:

“2020-ci ildə prezident İlham Əliyevə istefa tələbi ilə paylaşım etdiyim üçün hələ də məndən qisas alırlar.”

Qeyd edək ki, dövlət ittihamçısı ona 9 il azadlıqdan məhrumetmə cəzası tələb etmişdi. Məhkəmə Cinayət Məcəlləsinin 221.3-cü maddəsi (silah qismində əşyadan istifadə etməklə xuliqanlıq) üzrə ona qarşı irəli sürülmüş digər ittihama isə xitam verib.

Nicad İbrahim 2024-cü ilin sentyabrında Bakıda həbs olunub. Həbsindən öncə o, sosial şəbəkələrdə Azərbaycan polisi ilə bağlı tənqidi fikirlər paylaşırdı. Əvvəlcə onun ölkədən çıxışına qadağa qoyulub, daha sonra isə hazırkı cinayət işi çərçivəsində saxlanıldığı açıqlanıb.

İctimai fəal daha əvvəl də müxtəlif ittihamlarla dəfələrlə həbs olunub. 2021-ci ildə karantin qaydalarını pozmaq ittihamı ilə 1 il 3 ay müddətinə azadlıqdan məhrum edilib. O, eyni zamanda bir neçə il əvvəl ağzını tikərək aclıq aksiyası keçirməsi ilə gündəmə gəlmişdi.

Hüquq müdafiə təşkilatları Nicad İbrahimi siyasi məhbus kimi tanıyırlar.