Azərbaycanda Rusiya təsir şəbəkəsinə qarşı tədbirlər davam edir. Son günlərdə mediada bu şəbəkənin yeni ifşa olunmuş üzvlərinin adları açıqlanıb. Məlumata görə, Azərbaycandakı rusiyayönlü strukturlara qarşı son illərdə həyata keçirilən ardıcıl addımlar Moskva tərəfindən narazılıqla qarşılanıb.

İyulun 24-də TASS-ın baş direktorunun birinci müavini Mixail Qusmanın vəzifəsindən azad olunması da bu fonla əlaqələndirilir. Rusiya Baş naziri Mixail Mişustinin imzaladığı sərəncamla işdən çıxarılan Qusmanın, III Şuşa Qlobal Media Forumunda Prezident İlham Əliyevə verdiyi sualın Rusiya elitasında ciddi qıcıq doğurduğu bildirilib. Rusiya Prezident Administrasiyası rəhbərinin müavini Aleksey Qromov və TASS-ın baş direktoru Andrey Kondraşovun Qusmana narazılıqlarını açıq şəkildə bildirdiyi qeyd olunur.



Məqalələrdə, eyni zamanda, Azərbaycanda son illər vəzifədən kənarlaşdırılan Rusiya təsir agenturasının üzvləri də sadalanır. 2020-ci ildə baş verən dəyişikliklər çərçivəsində bu şəbəkənin başında dayanan Ramiz Mehdiyev və ordu içindəki əsas fiquru – Nəcməddin Sadıkov vəzifədən uzaqlaşdırılıb. Həmin dövrdə Əli Həsənov, Əbülfəs Qarayev, Elmar Məmmədyarov, Oqtay Əsədov, Azad Rəhimov və Eldar Mahmudov kimi adlar da eyni aqibəti yaşayıb.

Xüsusilə diqqətçəkən məqamlardan biri isə Milli Məclisin keçmiş sədri Oqtay Əsədovun da bu şəbəkə ilə əlaqələrinin ilk dəfə ictimailəşməsidir. Həmçinin Prezident Administrasiyasının sabiq əməkdaşı Azər Qasımovun bu yaxınlarda ifşa olunması və ictimaiyyət qarşısından uzaqlaşdırılması bu kontekstdə göstərilib.

Adı çəkilən digər şəxs isə keçmiş deputat Elşad Mirbəşirdir. Onun Rusiya Federal Təhlükəsizlik Xidməti (FTX) ilə əlaqələrinin üzə çıxdığı və bu səbəbdən həm ictimai sferadan, həm də Sosial Tədqiqatlar Mərkəzindən kənarlaşdırıldığı qeyd olunur.

Son aylar “Rus evi” və “Sputnik” kimi rusiyayönlü qurumların fəaliyyətinə də məhdudiyyətlərin qoyulması Rusiya-Azərbaycan münasibətlərində gərginlik yaradan səbəblərdən biri kimi təqdim edilir.

Yayımlanan analizlərə əsasən, Moskvanın Azərbaycana qarşı sərt ritorikasının əsas səbəbi rəsmi Bakının Ukraynaya dəstəyindən çox, ölkə daxilində Rusiya təsir şəbəkəsinə qarşı həyata keçirilən ardıcıl və sistemli tədbirlərdir. Bu amil, Kremldə ciddi narazılıq doğurur və iki ölkə arasında münasibətlərə öz təsirini göstərir.