Moskva vilayəti Azərbaycanlıları Regional Milli-Mədəni Muxtariyyətinin sədri Elşən İbrahimovun Rusiya vətəndaşlığı ləğv olunub. Bu məlumatı İbrahimov özü də təsdiqləyib.

Verilən məlumata əsasən, vətəndaşlıqdan məhrumetmə qərarı “Rusiya Federasiyasının milli təhlükəsizliyinə təhdid yaradan hərəkətlər” əsas gətirilərək verilib. Hazırda Rusiyadan çıxan İbrahimov, yaxın günlərdə Azərbaycana qayıtdıqdan sonra məsələyə dair geniş açıqlama verəcəyini bildirib.

İbrahimovun vətəndaşlıqdan çıxarılması, Rusiya ilə Azərbaycan arasında son dövrlər baş verən diplomatik gərginliyin fonunda baş verir. Xüsusilə Yekaterinburqda bir neçə etnik azərbaycanlının illər əvvəl baş vermiş bir qətl hadisəsinə görə saxlanılması, Rusiya hüquq-mühafizə orqanlarının azərbaycanlılara qarşı reydlər keçirməsi iki ölkə arasında münasibətləri xeyli gərginləşdirib. Hadisələrin ardınca həm Rusiyada azərbaycanlılara, həm də Azərbaycanda rus vətəndaşlarına qarşı zorakı həbslər qeydə alınıb.

Hazırda Elşən İbrahimovun konkret olaraq hansı addımlarına görə “milli təhlükəsizlik” üçün təhdid sayıldığı açıqlanmayıb. Onun Azərbaycana döndükdən sonra verəcəyi açıqlama bu məsələyə aydınlıq gətirə bilər.

Qeyd edək ki, Elşən İbrahimov uzun illərdir Rusiyada fəaliyyət göstərən tanınmış diaspor rəhbərlərindən biridir və Moskva vilayətində Azərbaycan icmasının təşkilatlanması və mədəni fəaliyyətlərinin koordinasiyasında fəal rol oynayıb. Onun vətəndaşlıqdan çıxarılması Rusiyadakı Azərbaycan diasporu üçün də ciddi bir siqnal kimi qiymətləndirilir.