USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Siyasi məhbus Zamin Zəkinin səhhəti pisləşib
“QHT işi” üzrə həbs olunan sosial işçi və ictimai fəal Zamin Zəkinin səhhətində ciddi pisləşmə müşahidə olunub. Bu barədə “Abzas Media”ya onun yaxınları məlumat verib.
Məlumata görə, əvvəllər revmatizmdən əziyyət çəkən Zamin Zəkinin xəstəliyi rütubətli şəraitdə saxlanılması və yay aylarında havanın kəskin istiləşməsi səbəbilə şiddətlənib. Hazırda onun ayaqlarında tutulmalar yaranıb, bu isə hərəkətində ciddi çətinliklərə səbəb olur.
Yaxınlarının sözlərinə görə, saxlandığı kamerada fasiləsiz siqaret çəkilməsi də onun səhhətinə mənfi təsir göstərir və nəfəs almasında problemlər yaradır. Həmçinin, Zamin Zəki həbs olunmazdan əvvəl göz əməliyyatı keçirib və indi gözlərində ağrılar, təzyiq və davamlı baş ağrıları onun ümumi fiziki və psixoloji durumunu daha da ağırlaşdırır.
Zamin Zəki bu ilin aprel ayında “QHT işi” çərçivəsində həbs edilib. Aprelin 9-da barəsində 3 ay 4 gün müddətinə həbs qətimkan tədbiri seçilmişdi. İyulun əvvəlində bu müddət daha 3 ay uzadılıb. O, Cinayət Məcəlləsinin 193-1.3.2-ci (cinayət yolu ilə əldə edilmiş xeyli miqdarda əmlakı leqallaşdırma), 308.2-ci (vəzifə səlahiyyətlərindən sui-istifadə, ağır nəticələrə səbəb olduqda) və 313-cü (vəzifə saxtakarlığı) maddələri ilə ittiham olunur.
Hazırda Zamin Zəkinin ailəsi onun səhhətinə diqqət yetirilməsini və tibbi yardım göstərilməsini tələb edir.
