“Xebermen” saytının rəhbəri, jurnalist Polad Aslanov artıq 14 gündür aclıq aksiyasını davam etdirir. Bu barədə onun həyat yoldaşı Gülmirə Aslanova “Abzas Media”ya məlumat verib.

Onun sözlərinə görə, həbsxana rəhbərliyi jurnalistin aclıq aksiyasına başlaması barədə ərizəsini qəbul etməyib, müəssisənin həkimləri isə səhhəti ilə maraqlanmayıb. Aslanov hazırda digər məhbuslarla eyni şəraitdə saxlanılır.

Gülmirə Aslanova bildirib ki, Ombudsman Aparatına müraciət etsə də, hələlik həyat yoldaşının vəziyyəti ilə maraqlanan olmayıb. O, həmçinin sentyabrın 11-də Polad Aslanovla telefon danışığı zamanı onun həbsxanadakı problemlərdən bəhs etdiyini, lakin qəfildən əlaqənin kəsildiyini deyib:

“Polad deyirdi ki, müəssisədə onkoloji xəstəlikdən əziyyət çəkən məhbus müalicə olunmur, vərəm xəstəsi isə uzun müddətdir “Tubzon”a aparılmır. Ədliyyə Nazirliyinin tibbi məntəqəsində çarpayıların satıldığını ictimailəşdirdiyi üçün də cəzalandırıldığını söyləyirdi. Birdən-birə telefon səsi kəsildi və kiminsə ‘Bunun başının gülləsi çatmır’ dediyini eşitdim”.

Jurnalistin xanımı əlavə edib ki, 15 saylı ciddi rejimli cəzaçəkmə müəssisəsinin rəisi Ramiq Nəsibov sentyabrın 10-da Polad Aslanovu yanına çağıraraq, aclığı dayandıracağı təqdirdə şəraitinin yaxşılaşdırılacağını vəd edib.

“Polad isə deyib ki, yalnız müayinə sənədi təqdim olunarsa, ailə görüşləri və telefon zənglərinə qoyulan qadağa aradan qaldırılarsa, saxlanılma şəraiti yaxşılaşdırılarsa, normal mətbəx və soyuducu ilə təmin edilərsə, aclığı dayandıracaq”, – xanımı vurğulayıb.

Gülmirə Aslanova son iki ayda görüşlərdə də süni maneələrin yaradıldığını qeyd edib:

“Hər dəfə 2 saat gözlədirlər, psixoloji təzyiq göstərirlər. Mən dəfələrlə Penitensiar Xidmətə zəng etmişəm, amma nəticə olmayıb”.

Polad Aslanov avqustun 29-dan aclıq aksiyasına başlayıb. O, buna səbəb kimi saxlandığı müəssisənin tibbi məntəqəsindəki mətbəx və soyuducudan istifadəyə qoyulan qadağanı göstərib.

Xatırladaq ki, “Xebermen” portalının rəhbəri Polad Aslanov 2019-cu ilin noyabrında dövlətə xəyanət ittihamı ilə 16 il müddətinə azadlıqdan məhrum edilib. O, ittihamları qəbul etmir və həbsinin jurnalist fəaliyyətinə görə olduğunu bildirir.