USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Ailəsi: “Tofiq Yaqublunun müayinə və müalicəsi aparılmır”
Həbsdə olan müxalif siyasətçi Tofiq Yaqublunun səhhətinə görə lazımi tibbi xidmət göstərilmədiyi bildirilir.
Bu barədə onun qızı Nigar Həzi sentyabrın 22-də “Facebook” hesabında məlumat yayıb. O qeyd edib ki, atasının son aclıq aksiyası sağlamlığına ciddi təsir göstərib, lakin Penitensiar Xidmətin Müalicə Müəssisəsində saxlanılmasına baxmayaraq, ona müvafiq müayinə və müalicə aparılmır:
“T. Yaqublunun şərlənib həbs olunması bəs etmirmiş kimi, indi də onun həyatını riskə atırlar. İlham Əliyev atamın aclıq aksiyasında ölməməsinin qisasını belə alır”, – deyə N.Həzi bildirib.
Milli Şura və Müsavat Partiyasının üzvü olan Tofiq Yaqublu bu il martın 10-da Bakı Ağır Cinayətlər Məhkəməsinin hökmü ilə 9 il azadlıqdan məhrum edilib. O, Cinayət Məcəlləsinin külli miqdarda ziyan vurmaqla dələduzluq, saxta sənəd hazırlama və ya istifadəsi maddələri ilə təqsirli bilinib.
Siyasətçi isə ittihamları qurama hesab edir. Hökmə etiraz olaraq o, aprelin 1-dən mayın 10-a qədər aclıq aksiyası keçirib.
Tofiq Yaqublu bundan əvvəl də bir neçə dəfə həbs olunub. 2013-cü ildə İsmayıllıda keçirilən etiraz aksiyalarına görə 5 il müddətinə azadlıqdan məhrum edilib, lakin beynəlxalq təzyiqlərdən sonra 2016-cı ilin martında prezidentin əfv sərəncamı ilə azadlığa buraxılıb.
Onun son həbsi də beynəlxalq ictimaiyyət, ABŞ və Avropa İttifaqı tərəfindən kəskin tənqid olunub.
