İranın Mərkəzi Bankının rəhbəri Mohammad Reza Farzi ölkədə etirazlar başladıqdan qısa müddət sonra vəzifəsindən istefa verib. Buna səbəb İran milli valyutasının ABŞ dolları qarşısında rekord həddə ucuzlaşması olub.

İstefa barədə məlumatı dövlət televiziyası yayıb. Bildirilir ki, valyuta böhranı fonunda paytaxt Tehranla yanaşı bir neçə şəhərdə narazılıqlar başlayıb.

Məlumata görə, yüzlərlə treyder və mağaza sahibi Tehranın mərkəzində yerləşən Sədi küçəsində, eləcə də paytaxtın əsas Böyük Bazarına yaxın Şuş məhəlləsində etiraz aksiyaları keçirib. Etirazçılar milli valyutanın dəyərdən düşməsinə və iqtisadi vəziyyətin pisləşməsinə etiraz ediblər.

Qeyd edək ki, Tehran bazarının tacirləri 1979-cu ildə monarxiyanın devrilməsi və islamçıların hakimiyyətə gəlməsi ilə nəticələnən İslam İnqilabı zamanı mühüm rol oynamışdı. Analitiklər bazar ətrafında baş verən etirazların İran hakimiyyəti üçün ciddi siqnal olduğunu bildirirlər.

Hazırda İran hökumətinin iqtisadi vəziyyətlə bağlı hansı addımlar atacağı və Mərkəzi Bank rəhbərliyində kimin təyin olunacağı ilə bağlı rəsmi açıqlama verilməyib.