Avropa İnsan Hüquqları Məhkəməsi (AİHM) “İşçi Masası” Həmkarlar İttifaqları Konfederasiyasının üzvü Möhyəddin Orucovla bağlı qərarını elan edib.

Qərara əsasən, Azərbaycan hökuməti fəalın hüquqlarının pozulduğunu etiraf edib və ona ümumilikdə 1125 avro məbləğində kompensasiya ödəyəcək. Bunun 900 avrosu mənəvi zərərə, 225 avrosu isə əlavə xərclərə görə nəzərdə tutulub.

“İşçi Masası”nın verdiyi məlumata görə, şikayət Orucovun 2023-cü il oktyabrın 18-də 30 sutka inzibati qaydada həbs edilməsi və 200 manat cərimə olunması ilə bağlı idi. Fəal məhkəmə araşdırmasının ədalətli aparılmadığını bildirərək, Avropa Konvensiyasının 6-cı maddəsi – “ədalətli məhkəmə araşdırması hüququ” üzrə AİHM-ə müraciət etmişdi.

Azərbaycan hökuməti əvvəlcə dostcasına həll variantlarını müzakirə etsə də, daha sonra birtərəfli bəyanat təqdim edərək hüquq pozuntusunu qəbul edib və kompensasiya ödəməyə razılığını bildirib.

Hazırda Möhyəddin Orucov Cinayət Məcəlləsinin 234.4.3-cü maddəsi (külli miqdarda narkotik maddə saxlama və satma) ilə 3 il müddətinə azadlıqdan məhrumetmə cəzası çəkir. O, ittihamları qəbul etmir və həbsinin siyasi fəaliyyəti ilə bağlı olduğunu bildirir.

Ayxan İsrafilovun azadlığa buraxılması ilə bağlı müraciət rədd edilib

“İşçi Masası”nın İdarə Heyətinin üzvü Ayxan İsrafilovun saxlandığı 10 saylı cəzaçəkmə müəssisəsində müəssisədaxili məhkəməsi keçirilib.

İsrafilov 2023-cü il avqustun 11-də həbs olunub və Cinayət Məcəlləsinin 234.1-1-ci maddəsi (satış məqsədi olmadan külli miqdarda narkotik əldə etmə, daşıma, saxlama) ilə ittiham olunaraq, 3 il azadlıqdan məhrumetmə cəzası alıb.

Fəal ittihamları qəbul etmir, narkotiklə şərlənərək həbs edildiyini, bunun əmək hüquqları uğrunda fəaliyyəti və siyasi baxışları ilə əlaqəli olduğunu bildirir.

“İşçi Masası”nın məlumatına görə, müəssisədaxili məhkəmələr adətən nümunəvi davranış göstərən məhbusların azadlığa buraxılması ilə nəticələnir. Lakin Ayxan İsrafilovun işində fərqli qərar çıxarılıb – məhkəmə onun 2024-cü ildə 10 gün karserdə saxlanılmasını əsas gətirərək azadlığa buraxılması barədə müraciətinə rədd cavabı verib.

İsrafilov bu qərarla razılaşmadığını, karserə salınma barədə sənədlərin saxta olduğunu bildirib.