Heyvan haqları fəalı Elxan Mirzəyev 2 ay müddətinə inzibati qaydada həbs edilib. Bu barədə məlumatı onun yaxınları AzadlıqRadiosuna veriblər.

Məlumata görə, Mirzəyev İnzibati Xətalar Məcəlləsinin 206-cı maddəsi — qanunsuz olaraq narkotik maddələrin istehlakı, satış məqsədi olmadan az miqdarda hazırlanması və ya əldə edilməsi — ilə təqsirli bilinib.

Fəal oktyabrın 1-də axşam saatlarında, Lerik rayonunun Günəşli kəndindəki evindən 7-8 mülki geyimli şəxs tərəfindən aparılıb. O, yalnız oktyabrın 6-da ailəsi və vəkili ilə əlaqə saxlaya bilib.

Elxan Mirzəyev artıq 10 ildən çoxdur heyvan haqları sahəsində fəaliyyət göstərir. O, bir neçə fəalla birlikdə sahibsiz itlərin küçələrdə güllələnməsi ilə bağlı Bakı Şəhər İcra Hakimiyyətinə qarşı məhkəmə iddiası qaldırmaqla tanınıb.

Heyvansevərlər həmçinin “Toplan” Sahibsiz İtlərə Qayğı Mərkəzinin qarşısında bir neçə dəfə etiraz aksiyası keçiriblər. Onlar mərkəzdə küçədən toplanan itlərin öldürüldüyünü iddia ediblər.

2021-ci ildə Mirzəyev həmin aksiyalara görə 15 sutka inzibati həbs almışdı. Daha sonra “Toplan” mərkəzinin iki əməkdaşı onun və digər fəalların əleyhinə məhkəməyə müraciət etmiş, nəticədə fəallar cərimələnmişdi.

Ailəsinin verdiyi məlumata görə, Elxan Mirzəyev özünü təqsirli bilmir və çıxarılmış məhkəmə qərarından apellyasiya şikayəti verəcək.