İranda iqtisadi vəziyyətin ağırlaşması fonunda başlayan etiraz aksiyaları davam edir. AzadlıqRadiosunun Fərda xidmətinin məlumatına görə, yanvarın 4-də Elam vilayətində keçirilən etirazlar zamanı bir neçə etirazçı həyatını itirib. Aksiyalar zamanı “Xameneiyə ölüm” şüarları səsləndirilib. Hələlik təsdiqlənməmiş məlumatlara əsasən, ölənlərin ümumi sayı 5 nəfər ola bilər.

İran İslam İnqilabı Keşikçiləri Korpusuna (SEPAH) yaxın olan “Fars” agentliyi Elam vilayətində azı 3 nəfərin öldüyünü təsdiqləyib. SEPAH-a yaxın digər media qurumu “Tasnim” isə etirazlar zamanı hökumət qüvvələrindən bir nəfərin həlak olduğunu bildirib.

Yanvarın 4-də etiraz aksiyaları Tehran, Şiraz, Həmədan, Zəncan və bir sıra digər şəhərlərdə də davam edib. Hələlik azərbaycanlıların çoxluq təşkil etdiyi şimal-qərb bölgələrində genişmiqyaslı etirazların keçirilməsi ilə bağlı məlumat yayılmayıb.

Tehranın Narmak rayonunda etirazçılar “Bu son döyüş deyil, Pəhləvi geri qayıdır” şüarını səsləndiriblər. Bu şüar 1979-cu ildə devrilmiş İran şahının nəslinə işarədir. Şahın hazırda Qərbdə yaşayan oğlu etirazlar fonunda bəyanat yayaraq, İran üçün xüsusi keçid dövrü proqramı hazırladığını açıqlayıb.

Azərbaycanlıların yaşadığı Zəncan şəhərində etirazlar zamanı “Diktatora ölüm” şüarı səsləndirilib. Qəzvin şəhərində isə “Seyid Əlini devirin”, “Xameneiyə ölüm” çağırışları ilə aksiyalar keçirilib.

Məlumata görə, etirazlar dolların məzənnəsinin ucuzlaşmasından sonra başlayıb. İranın ali dini lideri etirazçıların dinlənilməli olduğunu bildirsə də, iğtişaş törədənləri qiyamçı adlandırıb. ABŞ Prezidenti Donald Tramp isə İran hakimiyyətinin etirazçılara atəş açacağı təqdirdə İran xalqına yardım edəcəklərini bəyan edib.