İranın Ali Lideri Ayətullah Əli Xameneinin ölkədə etirazların təhlükəsizlik qüvvələri tərəfindən nəzarət altına alına bilməyəcəyi təqdirdə təxliyə planı hazırladığı iddia olunur.

Bu barədə “The Times” nəşri kəşfiyyat hesabatına istinadən məlumat yayıb. Bildirilir ki, Xamenei ordunun və təhlükəsizlik qüvvələrinin etirazçıların tərəfinə keçdiyini və ya verilən əmrləri yerinə yetirmədiyini görərsə, paytaxt Tehrandan qaçmaq üçün plan hazırlayıb.

Məlumata görə, 86 yaşlı İran liderinin təxliyə zamanı təxminən 20 nəfərlik yaxın ətrafı və ailə üzvləri tərəfindən müşayiət olunacağı qeyd edilir. Planın əsas istiqamətinin isə Rusiya paytaxtı Moskva olduğu bildirilir.

Uzun illər İsrail kəşfiyyatına xidmət etmiş və İslam İnqilabından səkkiz il sonra İrandan qaçmış Beni Sabti nəşrə açıqlamasında, “Xamenei Moskvaya qaçacaq, çünki onun başqa alternativi yoxdur”, – deyə bildirib.

“The Times”ın yazdığına görə, bu qaçış planı 2024-cü ilin dekabrında devrilmiş Suriya lideri Bəşər Əsədin Dəməşqdən Moskvaya qaçışı nümunəsi əsasında hazırlanıb.

Qeyd edək ki, rəsmi Tehran bu iddialarla bağlı hələlik hər hansı açıqlama verməyib.