Şuşa Bəyannaməsinin imzalanmasından 5 il ötür. 15 iyun 2021-ci ildə imzalanan sənəd Azərbaycan və Türkiyə arasında münasibətləri strateji müttəfiqlik səviyyəsinə yüksəldən ən mühüm siyasi-hüquqi sənədlərdən biri hesab olunur.

Bəyannamə Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan tərəfindən Şuşa şəhərində imzalanıb. Sənəd iki ölkə arasında siyasi, hərbi, iqtisadi, mədəni və humanitar sahələrdə əməkdaşlığın daha da dərinləşdirilməsini nəzərdə tutur.

Şuşa Bəyannaməsi ilə tərəflər qarşılıqlı hərbi yardım və təhlükəsizlik sahəsində əməkdaşlığın genişləndirilməsi, eləcə də regional sülh və sabitliyin qorunması istiqamətində birgə fəaliyyət öhdəliyi götürüblər. Sənəddə həmçinin müdafiə sənayesi, enerji təhlükəsizliyi və nəqliyyat-logistika sahələrində strateji tərəfdaşlığın gücləndirilməsi xüsusi yer alır.

Mütəxəssislərin fikrincə, bəyannamə regionda dəyişən geosiyasi reallıqlar fonunda Azərbaycan-Türkiyə ittifaqını daha da möhkəmləndirib və iki ölkənin beynəlxalq arenada koordinasiyalı fəaliyyətinə hüquqi-siyasi baza yaradıb.

Son 5 il ərzində sənədin icrası istiqamətində bir sıra mühüm addımlar atılıb. Xüsusilə müdafiə sahəsində birgə təlimlər, qarşılıqlı səfərlər və strateji koordinasiya mexanizmləri genişlənib.

Şuşa Bəyannaməsi həmçinin Türk dünyası daxilində inteqrasiyanın güclənməsinə də töhfə verən əsas sənədlərdən biri kimi dəyərləndirilir. Politoloqlar bu sənədi Azərbaycan-Türkiyə münasibətlərində “tarixi dönüş nöqtəsi” kimi xarakterizə edirlər.

Bəyannamənin imzalanmasının 5-ci ildönümü münasibətilə iki ölkə arasında strateji əməkdaşlığın daha da genişlənəcəyi və yeni layihələrlə zənginləşəcəyi gözlənilir.