Azərbaycanda həbsdə olan Ruben Vardanyan aclıq aksiyasına başlayıb.

O, bunu “beynəlxalq və Azərbaycan prosessual hüququnun kobud şəkildə pozulmasına cavab” adlandırır.

Azərbaycanda həbsdə olan milyarder, Qarabağdakı separatçıların keçmiş “dövlət naziri” Ruben Vardanyanın növbəti dəfə aclıq aksiyasına başladığı bildirilir.

O, bu barədə fevralın 19-da ailəsi vasitəsilə “Telegram”da yayılan bəyanatında bildirib.

Ruben Vardanyan aclıq aksiyasını “beynəlxalq və Azərbaycan prosessual hüququnun kobud şəkildə pozulmasına cavab” adlandırır.

“Məhkəmə zalında baş verənləri məhkəmə prosesi adlandırmaq olmaz – bu, mənim ədalətli mühakimə hüququma nümayişkaranə şəkildə məhəl qoyulmadığı siyasi şoudur”, – Vardanyan yazır.

Vardanyan “hüquqi prosesin kobud şəkildə pozulması” ilə üzləşdiyini, nə ona, nə də vəkili Avraam Bermana cinayət işinin 422 cildi ilə tanış olmaq imkanı verilmədiyini bildirib:

“Üstəlik, beynəlxalq hüquq qrupuma mənimlə əlaqə saxlamaq və ya mənimlə görüşmək qadağan edilib. Onların heç bir iş materialına çıxışı yox idi”.

Azad olunması tələbi ilə Vardanyan 2024-cü ilin aprelində də aclıq aksiyası keçirmişdi. Amma Azərbaycanın müvafiq orqanları onun həyat yoldaşı Veronika Zonabendlə telefonla danışmasına icazə verdikdən sonra o, aksiyasını dayandırmışdı.

Ruben Vardanyana qarşı Cinayət Məcəlləsinin 214-1 (terrorçuluğu maliyyələşdirmə), 279.3 (qanunvericiliklə nəzərdə tutulmayan silahlı birləşmələrin yaradılmasında və fəaliyyətində iştirak) və 318.1-ci (Azərbaycanın dövlət sərhədini qanunsuz keçmə) maddələri ilə ittiham irəli sürülüb.

2023-cü ilin sentyabrında Qarabağda əməliyyatlardan sonra Ruben Vardanyan Laçın dəhlizində saxlanılıb.