ABŞ dövlət katibi Marco Rubio bu ilin yayında keçiriləcək futbol üzrə dünya çempionatı ilə bağlı İran millisinin iştirakına münasibət bildirib.

O, aprelin 23-də Ağ Evdə jurnalistin sualını cavablandırarkən deyib ki, ABŞ İran yığmasının turnirdə iştirakına qarşı deyil.

Bununla belə, Rubio futbolçuları müşayiət edəcək bəzi şəxslərin ölkəyə buraxılmasına məhdudiyyət qoyula biləcəyini vurğulayıb. Onun sözlərinə görə, problem idmançılarla bağlı deyil, onları müşayiət edə biləcək şəxslərlə əlaqədardır.

“İranla bağlı problem onların idmançıları deyil. Problem onların idmançıların yanında gətirmək istəyə biləcəyi bəzi digər insanlardır. Onlardan bəzilərinin İslam İnqilabı Keşikçiləri Korpusu ilə əlaqələri var. Biz onları ölkəyə buraxa bilməyə bilərik. Onlar bir dəstə SEPAH üzvünü jurnalist və ya məşqçi kimi təqdim edə bilməzlər”, – deyə Rubio bildirib.

İran tərəfi isə daha əvvəl çempionatda iştirak edəcəyini, lakin ABŞ-ni boykot edəcəyini açıqlayıb.

ABŞ, Meksika və Kanadanın birgə ev sahibliyi edəcəyi turnirin FIFA tərəfindən təşkil olunması planlaşdırılır. İran millisinin qrup mərhələsində Yeni Zelandiya, Belçika və Misirlə qarşılaşacağı gözlənilir.

İyunun 11-dən iyulun 19-dək davam edəcək çempionatda İranın qrup oyunlarını əsasən ABŞ-də keçirməsi nəzərdə tutulur. Bununla yanaşı, Claudia Sheinbaum bildirib ki, ölkəsi İranın oyunlarına ev sahibliyi etməyə hazırdır, lakin son qərarı FIFA verəcək.

Qeyd edək ki, fevralın 28-də ABŞ və İsrail tərəfindən İrana qarşı hava zərbələri endirilib. Hazırda tərəflər arasında atəşkəs qüvvədə olsa da, gərginlik tam aradan qalxmayıb.