USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
İlham Əliyev Gürcüstanın Baş naziri ilə görüşüb, mühüm sazişlər imzalanıb
İlham Əliyev mayın 18-də İrakli Kobaxidze ilə görüş keçirib.
Görüş zamanı Prezident İlham Əliyev bu ilin aprelində Gürcüstana etdiyi dövlət səfərini xatırladaraq, səfərin iki ölkə arasında münasibətlərin möhkəmlənməsinə mühüm töhfə verdiyini bildirib. Dövlət başçısı, həmçinin bu gün imzalanan sənədlərin əməkdaşlığın genişlənməsi baxımından əhəmiyyətini vurğulayıb.
İrakli Kobaxidze Azərbaycanda olmaqdan məmnunluğunu ifadə edib, Prezident İlham Əliyevin Gürcüstana səfərinin hər iki ölkədə dərin təəssürat yaratdığını qeyd edib. O, Azərbaycan və Gürcüstanın regionda nəqliyyat və enerji bağlantıları baxımından mühüm rol oynadığını bildirib.
Gürcüstanın Baş naziri, həmçinin UN-Habitat tərəfindən təşkil olunan Ümumdünya Şəhərsalma Forumunun 13-cü sessiyasının Bakıda keçirilməsi münasibətilə Azərbaycan Prezidentini təbrik edib.
Görüşdə iki ölkə arasında siyasi, iqtisadi-ticari, enerji, nəqliyyat, logistika və sərmayə sahələrində əməkdaşlığın genişləndirilməsi imkanları müzakirə olunub, qarşılıqlı səfərlərin əhəmiyyəti qeyd edilib.
Görüşün yekununda bir sıra mühüm sənədlər imzalanıb. Bunlara Azərbaycan qazının Gürcüstana təchizatı, elektrik enerjisinin ötürülməsi və tranziti, eləcə də Bakı–Tbilisi–Qars dəmir yolu layihəsi çərçivəsində Marabda–Kartsaxi dəmir yolu sahəsinin inkişafına dair razılaşmalar daxildir.
