Bu gün – 31 may tarixində dünyada Ümumdünya Tütünsüz Günü qeyd olunur. 1988-ci ildən etibarən World Health Organization-nun (ÜST) təşəbbüsü ilə keçirilən bu günün məqsədi tütün istifadəsinin insan sağlamlığına vurduğu zərərlərə diqqət çəkmək və ölkələri tütünlə mübarizə sahəsində daha effektiv addımlar atmağa çağırmaqdır.

ÜST-ün məlumatına görə, builki kampaniya gənclərin tütün və nikotin məhsullarından qorunmasına həsr olunub. Təşkilat xəbərdarlıq edir ki, tütün və nikotin sənayesi məhsullarını xüsusilə yeniyetmələr və gənclər üçün daha cəlbedici hala gətirməyə çalışır, bu isə asılılıq riskini artırır.

Məlumata əsasən, tütün istifadəsi hər il dünyada 7 milyondan çox insanın ölümünə səbəb olur. Bu zərərli vərdiş ürək-damar və tənəffüs sistemi xəstəlikləri, eləcə də 20-dən artıq xərçəng növünün yaranması ilə əlaqələndirilir.

ÜST dünya üzrə 1 milyarddan çox tütün, elektron siqaret və digər nikotin məhsulları istifadəçisini bu gündən etibarən sağlam həyat seçimi etməyə və zərərli vərdişlərdən uzaqlaşmağa çağırıb.

Təşkilatın açıqladığı statistikaya görə, dünyada 13–15 yaş arasında ən azı 40 milyon uşaq tütün məhsullarından istifadə edir. Son illərdə isə elektron siqaret və nikotin paketçiklərindən (nikotin pouçları) istifadə hallarında artım müşahidə olunur.

Azərbaycanda da tütünlə mübarizə istiqamətində mühüm addımlar atılıb. Ölkəmiz 2005-ci ildə ÜST-nin Tütünə Qarşı Mübarizə üzrə Çərçivə Konvensiyasına qoşulub. Bundan əlavə, 2017-ci il dekabrın 1-də qəbul edilmiş “Tütün məmulatlarının istifadəsinin məhdudlaşdırılması haqqında” Qanun ictimai yerlərdə siqaret çəkilməsinin məhdudlaşdırılması və əhalinin sağlamlığının qorunması baxımından mühüm əhəmiyyət daşıyır.

Mütəxəssislər bildirirlər ki, tütün istifadəsindən imtina etmək sağlam həyatın ən vacib addımlarından biridir və bu qərar insanın həyat keyfiyyətini əhəmiyyətli dərəcədə yaxşılaşdıra bilər.