Odessa limanında Türkiyəyə məxsus gəmilərin hədəfə alınması Rusiya-Türkiyə münasibətlərinə ciddi təsir göstərməsə də, bölgədə təhlükəsizlik risklərinin artdığını nümayiş etdirir.

Bu fikirləri politoloq Məhəmməd Əsədullazadə səsləndirib. Onun sözlərinə görə, Odessa limanında Türkiyə gəmilərinin hədəfə alınması ilk belə hadisə deyil və müharibə şəraitində oxşar halların baş verməsi mümkündür.

Ekspert hesab edir ki, Ankara Rusiya-Ukrayna müharibəsində balanslı mövqe nümayiş etdirdiyi üçün Moskva Türkiyə ilə birbaşa qarşıdurmada maraqlı deyil:

“Rusiya yaxşı anlayır ki, Türkiyə ilə açıq qarşıdurma onun maraqlarına uyğun deyil. Buna görə də Moskvanın məqsədli şəkildə Ankara ilə üz-üzə gəlmək istədiyini düşünmürəm”.

Politoloqun fikrincə, hadisə daha çox Rusiyanın Ukraynaya qarşı həyata keçirdiyi hərbi təzyiqlərin tərkib hissəsidir və eyni zamanda Odessa limanına daxil olan və ya limandan çıxan gəmilər üçün təhlükənin artdığına dair siqnal xarakteri daşıyır.

Məhəmməd Əsədullazadə vurğulayıb ki, Türkiyə ilə Rusiya arasında enerji, ticarət, turizm və regional təhlükəsizlik sahələrində formalaşmış əməkdaşlıq mexanizmləri mövcuddur. Bu səbəbdən ayrı-ayrı insidentlərin iki ölkə arasında dərin siyasi böhrana çevriləcəyi gözlənilmir.

Onun sözlərinə görə, tərəflər arasında diplomatik kanallar açıq qalır və bu cür hadisələrin münasibətlərə mənfi təsirinin minimuma endirilməsi üçün qarşılıqlı təmaslar davam etdirilir.