Azərbaycanda 10-17 yaş aralığında olan uşaqların 89 faizi smartfon istifadəçisidir, onların 76 faizi isə hər gün sosial media platformalarına daxil olur.

Bu barədə Milli Məclisin komitələrinin birgə iclasında çıxışı zamanı Zahid Oruc məlumat verib.

Onun sözlərinə görə, Ümumdünya Səhiyyə Təşkilatının 2023-cü il hesabatına əsasən, dünyada 13-17 yaşlı yeniyetmələrin 95 faizi aktiv sosial media istifadəçisidir və onların 35 faizi gündə 5 saatdan çox vaxtını telefonda keçirir.

Komitə sədri bildirib ki, Sosial Tədqiqatlar Mərkəzinin 2025-ci ildə apardığı sorğunun nəticələrinə görə, Azərbaycanda 10-17 yaş qrupunda gündəlik orta sosial media istifadə müddəti 4 saat 12 dəqiqədir. Həmçinin 12-15 yaşlı uşaqların 42 faizi gecə saat 23:00-dan 02:00-dək telefondan istifadə edir.

Z.Oruc qeyd edib ki, son illərdə ekran vaxtı ilə bağlı psixoloji müraciətlər də artıb. Respublika Uşaq Klinikasının statistikasına əsasən, 2022–2025-ci illər ərzində bu səbəbdən edilən müraciətlərin sayı 4,7 dəfə yüksəlib.

Müzakirə olunan qanun layihəsinə əsasən, Azərbaycanda sosial şəbəkələrdə hesab açmaq üçün minimum yaş həddinin 16 yaş müəyyən edilməsi təklif olunur. Layihəyə görə, 16 yaşdan kiçik şəxslərin sosial media platformalarında fərdi hesab yaratması məhdudlaşdırılacaq.

16-18 yaş arası yeniyetmələrin isə sosial şəbəkələrdə hesab açması yalnız valideyn və ya digər qanuni nümayəndənin razılığı ilə mümkün olacaq.

Komitə sədrinin sözlərinə görə, təklif olunan dəyişikliklərin məqsədi uşaqları sosial şəbəkələrin mənfi təsirlərindən, onlayn zorakılıq, istismar və digər risklərdən qorumaqdır. O əlavə edib ki, 2025-ci ilin sonunda keçirilən ictimai rəy sorğusunda respondentlərin 87,3 faizi 16 yaşdan aşağı uşaqların sosial media istifadəsinin tənzimlənməsini dəstəkləyib.