ABŞ-ın NATO-nun Avropadakı əməliyyatları üçün ayırdığı döyüş təyyarələri və hərbi gəmilərin sayını azaltmağı planlaşdırdığı bildirilir.

“The New York Times” qəzetinin Avropalı yüksək vəzifəli şəxslərə istinadən yaydığı məlumata görə, Vaşinqtonun bu qərarı alyansın uzaqmənzilli zərbə imkanlarına və kəşfiyyat fəaliyyətlərinə təsir göstərə bilər.

Məlumata əsasən, ABŞ Avropadakı NATO missiyaları üçün ayırdığı F-16 və F-15E qırıcılarının sayını təxminən 150-dən 100-ə endirməyi nəzərdə tutur. Həmçinin dəniz kəşfiyyat təyyarələrinin sayının 26-dan 15-ə qədər azaldılması planlaşdırılır.

Bundan əlavə, ABŞ-ın Avropadan yanacaqdaşıyan səkkiz hərbi təyyarəni geri çəkməyi, eləcə də bir sualtı qayığı, aviadaşıyıcı və həmin gəmi qrupuna aid bir sıra hərbi vasitələri regiondan çıxarmağı planlaşdırdığı qeyd olunur.

Qəzetin mənbələri bildiriblər ki, bu proses Avropa müttəfiqlərinin gözlədiyindən daha tez başlaya bilər. ABŞ-ın NATO-dakı hərbi mövcudluğunu azaltmaq qərarının əsas səbəblərindən biri kimi diqqətin Sakit okean regionuna yönəldilməsi göstərilir.

Daha əvvəl Avropa mediasında da Vaşinqtonun NATO qarşısında öhdəlikləri çərçivəsində hərbi qüvvələrin yenidən bölüşdürülməsi ilə bağlı planlar barədə məlumatlar yayılmışdı.

ABŞ-ın mümkün addımı Avropada təhlükəsizlik siyasəti və NATO daxilində müdafiə imkanlarının bölüşdürülməsi ilə bağlı yeni müzakirələrə səbəb ola bilər.