Sumqayıtda fəaliyyət göstərən “Qurtuluş” Reabilitasiya Mərkəzinin rəhbəri Ceyhun Salmanov və daha iki əməkdaşının cinayət işi üzrə məhkəmə prosesi davam edib.

“Unikal”ın məlumatına görə, Sumqayıt Şəhər Məhkəməsində hakim Fərid Nəsimiyevin sədrliyi ilə keçirilən iclasda zərərçəkmişlər və şahidlər ifadə veriblər.

Məhkəmədə çıxış edən zərərçəkmiş Raqif Babayev bildirib ki, reabilitasiya mərkəzinə valideynlərinin müraciəti əsasında aparılıb. Onun sözlərinə görə, qumar asılılığından əziyyət çəkdiyi üçün mərkəzdə qalmağa razılaşıb, lakin daha sonra oradan çıxmaq istəyib.

R.Babayev bildirib ki, etiraz olaraq yad əşyalar udub və buna görə döyüldüyünü iddia edib:

“Buna görə üz və qulaq nahiyəmdən ağır xəsarətlər almışdım. Bundan başqa, etiraz əlaməti olaraq dama çıxmışdım. 6-7 saat orada qaldım. Polis gəldi. Valideynlərimə də demişdim ki, reabilitasiya mərkəzində qalmaq istəmirəm”.

O qeyd edib ki, təqsirləndirilən şəxslərdən Ceyhun Salmanov tərəfindən ona qarşı zor tətbiq olunmayıb və hazırda onlardan şikayətçi deyil.

Daha sonra Raqif Babayevin anası şahid qismində dindirilib. O bildirib ki, mərkəz barədə məlumatı sosial şəbəkədən əldə edib və oğlunun müalicəsi üçün müraciət edib.

“TikTok platformasında bu reabilitasiya mərkəzi barədə məlumat gördüm. Mərkəzə müraciət etdim və gecə saatlarında əməkdaşlar gəlib oğlumu apardılar. Aylıq 1000 manat ödəniş edirdim. Heç bir şikayətim yoxdur”, - deyə şahid bildirib.

Məhkəmədə ifadə verən digər zərərçəkmiş – tanınmış skripka ifaçısı Ramil Həsənov isə narkotik asılılığından əziyyət çəkdiyini deyib.

O bildirib ki, mərkəzdə təxminən iki ay qalıb və orada ona qarşı zorakılıq olmayıb:

“Orada ciddi nizam-intizam var idi. Mən sıxıldığım üçün çıxmaq istəyirdim. Mənə qarşı şiddət olmayıb. Ora gələndə könüllülüklə bağlı sənədə imza atmışdım. Orada sağalan insanlar çox idi. Mənim üçün də nəticə müsbət oldu”.

R.Həsənov da təqsirləndirilən şəxslərdən şikayətçi olmadığını qeyd edib.

Məhkəmə iclasında bildirilib ki, növbəti proses iyulun 1-də keçiriləcək.

Qeyd edək ki, “Qurtuluş Reabilitasiya Mərkəzi” MMC ilə bağlı Sumqayıt şəhər prokurorluğunda başlanmış cinayət işi üzrə müəssisənin direktoru Ceyhun Salmanov, eləcə də Elşad Məhərrəmov və Natiq Əliyev barəsində ittiham irəli sürülüb.

İstintaqın məlumatına görə, təqsirləndirilən şəxslərin qabaqcadan əlbir olaraq bir neçə şəxsi zor tətbiq etməklə və aldatmaqla mərkəzə gətirdikləri, onların iradələri ziddinə saxlanıldıqları, yaxınları ilə əlaqə imkanlarının məhdudlaşdırıldığı və fiziki-psixoloji təzyiqlərə məruz qaldıqları iddia olunur.

Onlara qarşı Cinayət Məcəlləsinin 145.2.1 və 145.2.4-cü maddələri (qabaqcadan əlbir olan bir qrup şəxs tərəfindən iki və daha çox şəxsi qanunsuz azadlıqdan məhrum etmə) ilə ittiham irəli sürülüb. Təqsirləndirilən şəxslər barəsində həbs qətimkan tədbiri seçilib.