Almaniya kansleri Fridrix Merz bildirib ki, G7 ölkələri Rusiyaya qarşı təzyiqləri artırmaq və Ukraynaya hərbi dəstəyi genişləndirmək barədə razılığa gəliblər.

Merz Fransanın Evian şəhərində keçirilən G7 sammiti çərçivəsində açıqlama verərək bildirib ki, həm Avropa İttifaqı, həm də ABŞ tərəfindən Rusiyaya qarşı yeni sanksiyaların tətbiqi gözlənilir.

“Bütün G7 tərəfdaşları sanksiyalar da daxil olmaqla, Moskvaya təzyiqi artıracaq. Bu, transatlantik birlik və qətiyyət baxımından yeni mərhələ yaradır”, – Almaniya kansleri deyib.

Onun sözlərinə görə, sammit uğurlu keçib və ABŞ Prezidenti Donald Trampın hakimiyyətə qayıtmasından sonra ilk dəfə əsas Qərb sənaye ölkələri birgə yekun bəyanat qəbul edə bilib.

Ukraynaya hərbi yardım artırılacaq

G7 ölkələri Rusiyanın təcavüzünə qarşı mübarizə aparan Ukraynaya “sarsılmaz dəstəyi” təsdiqləyib.

Sammit iştirakçıları Ukraynaya əlavə hava hücumundan müdafiə sistemləri, raketlər və uzaqmənzilli silah imkanlarının artırılacağını açıqlayıblar.

Bundan əlavə, ABŞ Prezidenti Donald Tramp Ukrayna və Avropa istehsalçılarının Amerika silahlarını lisenziya əsasında istehsal etməsinə icazə verilməsi imkanını nəzərdən keçirməyə hazır olduğunu bildirib.

G7-nin yekun bəyanatında deyilir ki, tərəflər “Ukraynada hərbi istehsalın artırılmasına imkan yaratmaq üçün lisenziyaların genişləndirilməsi məsələsini nəzərdən keçirməyə hazırdır”.

Rusiya enerji sektoruna qarşı yeni tədbirlər

G7 ölkələri Rusiyanın hərbi iqtisadiyyatına təzyiqi artırmaq niyyətində olduqlarını bildiriblər.

Bunun üçün əsas diqqət Rusiyanın neft və qaz ixracına yönəldiləcək. Bu sahə Moskvanın müharibəni maliyyələşdirməsinin əsas gəlir mənbələrindən biri hesab olunur.

Donald Tramp isə İranla bağlı münaqişə və enerji qiymətlərinin artması səbəbindən dayandırıldığı bildirilən Rusiya neft ixracına qarşı ABŞ sanksiyalarının “tezliklə” yenidən qüvvəyə minəcəyini açıqlayıb.

Merz: Avropa silah istehsalını artırmalıdır

Fridrix Merz Avropanın müdafiə sənayesinin imkanlarını əhəmiyyətli dərəcədə genişləndirməli olduğunu bildirib.

O qeyd edib ki, Ukrayna üçün silah istehsalında ABŞ şirkətlərinin Avropa və Ukrayna istehsalçılarına lisenziyalar verməsi mühüm rol oynaya bilər.

Konkret olaraq hansı silah növlərinin istehsal olunacağı açıqlanmayıb. Lakin Ukraynanın xüsusilə hava hücumundan müdafiə raketləri və uzaqmənzilli zərbə vasitələrinə ehtiyac duyduğu bildirilir.

Merz Donald Trampa əməkdaşlığa hazır olduğuna görə təşəkkür edib və vurğulayıb ki, hazırda əsas problem istehsal imkanlarının kifayət qədər olmamasıdır.

“Bizim hamımızın problemi odur ki, hazırda çox az istehsal edirik. Bu çatışmazlıq mövcud istehsal imkanlarına malik şirkətlərə lisenziyaların verilməsi ilə aradan qaldırıla bilər. Buraya həm Avropa, həm də Ukrayna şirkətləri daxildir”, – Merz bildirib.