Avropa İttifaqı Rusiyanın Ukraynaya qarşı müharibəsi ilə bağlı tətbiq etdiyi sanksiya siyahısını genişləndirib. Aİ Şurasının açıqlamasına görə, yeni paket çərçivəsində 34 fiziki şəxs və 47 hüquqi şəxs sanksiya siyahısına əlavə edilib.

Brüsselin məlumatına görə, yeni məhdudiyyətlər Rusiyanın hərbi-sənaye kompleksinin imkanlarını azaltmağa, enerji gəlirlərinə zərbə vurmağa, xüsusilə də “kölgə donanması” vasitəsilə həyata keçirilən neft ixracını məhdudlaşdırmağa, hibrid təhdidlərin və dövlət təbliğatının qarşısını almağa yönəlib.

Aİ-nin xarici işlər və təhlükəsizlik siyasəti üzrə ali nümayəndəsi Kaja Kallas bildirib ki, Qərbin tətbiq etdiyi sanksiyalar Rusiyaya artıq təxminən 1–1,3 trilyon avroya başa gəlib.

“Biz Rusiya hərbi iqtisadiyyatının təməlini addım-addım zəiflədirik”, – Kallas qeyd edib.

Rusiya hərbi sənayesinə qarşı yeni məhdudiyyətlər

Yeni sanksiyalar Rusiya hərbi sənayesini dəstəkləyən 7 fiziki şəxs və 21 hüquqi şəxsə qarşı tətbiq olunub.

Siyahıya Rusiya ordusu üçün pilotsuz uçuş aparatları və digər hərbi avadanlıqlar istehsal edən qurumlar, o cümlədən NPO Lavochkin, “ASFPG”, “IONOS”, “Rustakt”, Çinin Shenzhen Minghuaxin və Xinxiang Richful Lubricant Additive Company şirkətləri, eləcə də Rusiyanın “ERA” hərbi innovasiya texnopolu və Perspektivli Araşdırmalar Fondu daxil edilib.

“Kölgə donanması”na qarşı tədbirlər

Aİ Rusiyanın neft və neft məhsullarının ixracı ilə əlaqəli 24 hüquqi şəxs və 2 fiziki şəxsi də sanksiya siyahısına əlavə edib.

Siyahıda Rusiyanın neft ixracına kömək etdiyi iddia olunan “kölgə donanması” ilə bağlı şirkətlər yer alıb. Onların arasında Rusiya, Liberiya, Türkiyə, Birləşmiş Ərəb Əmirlikləri, Azərbaycan və Honkonqda qeydiyyatdan keçmiş şirkətlər də var.

Sanksiyaya məruz qalan şəxslər arasında azərbaycanlı iş adamı Tahir Qarayev və Rusiya vətəndaşı Konstantin Roqaçın adı da göstərilib.

Krım və Sevastopolla bağlı sanksiyalar uzadıldı

Aİ Şurası Rusiyanın 2014-cü ildə Krım və Sevastopolu ilhaq etməsi ilə bağlı tətbiq olunan məhdudiyyətlərin müddətini də uzadıb. Bu tədbirlər 23 iyun 2027-ci ilədək qüvvədə qalacaq.

Avropa İttifaqı bildirib ki, Ukraynaya siyasi, maliyyə, iqtisadi, humanitar, hərbi və diplomatik dəstəyi davam etdirəcək.

Brüssel həmçinin müharibənin dayandırılması istiqamətində aparılan diplomatik səyləri dəstəklədiyini açıqlayıb və Rusiyanı “tam, qeyd-şərtsiz və dərhal atəşkəsə” razılaşmağa, eləcə də davamlı sülh üçün danışıqlara başlamağa çağırıb.