Bakının Sabunçu rayonunun Nardaran qəsəbəsində yerləşən “Sea Breeze” istirahət kompleksinin hovuzunda azyaşlı uşaq həyatını itirib.

Hadisə avqustun 14-də baş verib. Fövqəladə Hallar Nazirliyinin (FHN) məlumatına görə, “112” qaynar xəttinə hovuzda uşağın ayağının su nasosunda sıxılı vəziyyətdə qalması barədə məlumat daxil olub.

Hadisə yerinə FHN-in Xüsusi Riskli Xilasetmə və Dövlət Yanğından Mühafizə xidmətlərinin əməkdaşları cəlb edilib.

Xilasetmə əməliyyatından sonra 2022-ci il təvəllüdlü Akif Cavid oğlu Abdullayevə təcili tibbi yardım göstərilib. Xilasedicilərin və tibb işçilərinin müdaxiləsinə, o cümlədən reanimasiya tədbirlərinə baxmayaraq, uşağın həyatını xilas etmək mümkün olmayıb.

FHN hadisə ilə bağlı aidiyyəti qurumlar tərəfindən araşdırma aparıldığını bildirib. Hələlik uşağın ayağının hovuzun su nasosunda hansı səbəbdən sıxıldığı və hovuzun təhlükəsizlik sistemlərinin vəziyyəti barədə ətraflı rəsmi məlumat açıqlanmayıb.

Nazirliyin məlumatında hadisənin “Sea Breeze” istirahət mərkəzində baş verdiyi göstərilsə də, kompleks ərazisində konkret hansı hovuzda baş verdiyi və həmin hovuzun hansı obyektə aid olduğu qeyd edilməyib.

“Sea Breeze” Nardaran ərazisində yerləşən iri istirahət və kurort kompleksidir. Kompleksin təsisçisi iş adamı və müğənni Emin Ağalarovdur.

Hadisənin dəqiq səbəblərinin aparılan araşdırmadan sonra müəyyənləşəcəyi gözlənilir.