Futbol üzrə 2026-cı il dünya çempionatında qrup mərhələsi başa çatıb və turnirin pley-off mərhələsi başlayır.

Mundialda 1/16 finala vəsiqə qazanan 32 komanda mübarizəni davam etdirəcək. İlk pley-off oyunu iyunun 28-də Los-Ancelesdə Cənubi Afrika Respublikası və Kanada yığmaları arasında keçiriləcək.

Turnirin əsas favoritləri sırasında Argentina, Fransa, İspaniya, İngiltərə, Braziliya və Almaniya göstərilir. Bu komandaların hamısı qrup mərhələsini keçərək mübarizəni davam etdirir.

Fransa millisi qrup mərhələsində inamlı çıxışı ilə diqqət çəkib. Komanda üç oyunun hamısında qalib gəlib və 10 qol vurub. Fransa millisinin liderlərindən Kilian Mbappe və Usman Dembele artıq hərəyə 4 qol vurublar.

Son dünya çempionu Argentina da qrup mərhələsində uğurlu çıxış edib. Lionel Messi üç oyunda 6 qol vuraraq bombardirlər yarışında liderliyə yüksəlib. Argentina 1/16 finalda Kabo-Verde ilə qarşılaşacaq.

İspaniya millisi turnirə gözlənildiyindən zəif başlasa da, sonrakı oyunlarda özünü toparlayıb və pley-offa yüksəlib. Komanda 1/16 finalda Avstriya ilə üz-üzə gələcək.

Portuqaliya millisi isə qrup mərhələsində qeyri-sabit çıxışla yadda qalıb. Kriştianu Ronaldunun komandası 1/16 finalda Xorvatiya ilə qarşılaşacaq. Bu görüş pley-off mərhələsinin ən maraqlı oyunlarından biri hesab olunur.

İngiltərə, Braziliya və Almaniya da titul uğrunda mübarizənin əsas iddiaçıları sırasındadır. İngiltərə 1/16 finalda DR Konqo, Braziliya Yaponiya, Almaniya isə Paraqvayla oynayacaq.

DÇ-2026-nın pley-off mərhələsi bir oyunluq sistemlə keçiriləcək. Məğlub olan komanda turniri tərk edəcək.