“Formula 1” yarışları Azərbaycanda ən azı 2029-cu ilə qədər keçiriləcək. Bu barədə sentyabrın 20-də qurumun rəsmi saytında məlumat verilib.

Bakı küçələrində təşkil olunan builki Azərbaycan Qran-prisinə sentyabrın 21-də yekun vurulacaq. Yarış 2016-cı ildən etibarən hər il Bakıda keçirilir və paytaxtın ən böyük beynəlxalq idman tədbirlərindən biri hesab olunur.

Rəsmi hesabatlara görə, ötən il dövlət büdcəsindən “Formula 1” Azərbaycan Qran-prisinin təşkilinə 168 milyon manat xərclənib. Bu rəqəm Milli Məclisin İqtisadi siyasət, sənaye və sahibkarlıq komitəsinin 2024-cü il dövlət büdcəsinin icrasına dair illik hesabatında əksini tapıb. Müqayisə üçün, digər tədbirlər üçün büdcədən ayrılan vəsait 1 milyon manatdan az olub.

Rəsmilər “Formula 1” yarışlarının ölkəyə xeyli sayda turist cəlb etdiyini və büdcəyə milyonlarla gəlir gətirdiyini vurğulayır. Bununla belə, bəzi ekspertlər gəlirlərin xərcləri tam ödəmədiyini iddia edir, tənqidçilər isə dövlət vəsaitlərinin təhsil, səhiyyə və regional inkişaf kimi sahələrə yönəldilməsinin daha məqsədəuyğun olacağını bildirirlər.