İyulun 1-dən etibarən “BakıKart” kartlarının satış qiyməti artırılacaq. Yeni tarifə əsasən, kartın qiyməti 2 manatdan 3 manata qaldırılacaq.

Məlumatı “BakıKart” sistemi yayıb. Bildirilib ki, kartlar 2015-ci ildən sərnişinlərin istifadəsinə verilib və ötən 11 il ərzində onların satış qiyməti dəyişməz qalıb.

Qurum qiymət artımını kart istehsalı, texniki xidmət, logistika və infrastruktur xərclərinin yüksəlməsi ilə izah edib. Qeyd olunub ki, mövcud iqtisadi şərait nəzərə alınaraq kartın satış dəyərinə yenidən baxılıb.

Açıqlamada vurğulanır ki, dəyişiklik yalnız yeni alınacaq “BakıKart”ların satış qiymətinə aiddir. Kartların balansı, gediş haqları və ictimai nəqliyyatda tətbiq olunan tariflərdə hər hansı dəyişiklik nəzərdə tutulmur.

Son illərdə ictimai nəqliyyatda alternativ ödəniş üsullarının genişləndirildiyi də xatırladılıb. Hazırda sərnişinlər “BakıKart”la yanaşı, NFC texnologiyalı bank kartları, mobil cihazlar və QR kod vasitəsilə də ödəniş edə bilirlər.

Bununla belə, kartın qiymətinin 50 faiz artırılması ictimai müzakirələrə səbəb olub. Ekspertlər hesab edirlər ki, istehsal və xidmət xərclərinin hansı səviyyədə artdığının açıqlanması və qərarın daha ətraflı əsaslandırılması sərnişinlər arasında yaranan sualları azaltmağa kömək edə bilər.