Ələt qəsəbəsi və Bakı Beynəlxalq Dəniz Ticarət Limanının yaxınlığında yeni hava limanının inşası davam etdirilir.

Yeni hava limanının əsas fəaliyyəti sərnişin daşımaları deyil, yük daşımaları olacaq. Layihənin məqsədi Azərbaycanın logistika imkanlarını genişləndirmək və ölkəni regionun mühüm nəqliyyat qovşaqlarından birinə çevirməkdir.

Bildirilib ki, hava limanı Orta Dəhliz və Zəngəzur dəhlizi üzərindən daşınan yüklərin daha sürətli və çevik şəkildə çatdırılmasına imkan yaradacaq. Xüsusilə yüksək dəyərə malik və qısa müddətdə təyinat nöqtəsinə çatdırılması tələb olunan yüklərin daşınmasında yeni imkanlar formalaşacaq.

Layihənin Ələt Azad İqtisadi Zonasında fəaliyyət göstərən müəssisələrin ixrac potensialına da töhfə verəcəyi gözlənilir. Yeni infrastruktur həm yerli istehsalçıların xarici bazarlara çıxışını asanlaşdıracaq, həm də Azərbaycana yeni investisiya imkanları qazandıra bilər.

Mütəxəssislərin fikrincə, yük hava limanının yaradılması Azərbaycanın dəniz, dəmir yolu və avtomobil nəqliyyatı ilə inteqrasiya olunmuş logistika sisteminin inkişafında mühüm addımlardan biri olacaq.

İlk yük hava limanının gələn il istifadəyə verilməsi planlaşdırılır.