Azərbaycan Baş Prokurorluğu Rusiya vətəndaşı, keçmiş hakim Yelena Xaxalevanın barəsində həbs qətimkan tədbirinin dəyişdirilməsi barədə məlumatı təsdiqləyib.

Baş Prokurorluğun mətbuat xidmətindən bildiriblər ki, Xaxalevanın həbsilə bağlı apellyasiya şikayətinə fevralın 4-də Bakı Apellyasiya Məhkəməsində baxılıb. Məhkəmə Xaxalevanın həbsi barədə qərarı ləğv edib, Bakının Xəzər Rayon Prokurorluğu isə onun polisin nəzarətinə verilməsi qətimkan tədbirini seçib.

Bundan əlavə, Yelena Xaxalevanın ekstradisiyası ilə bağlı Rusiya Federasiyası Baş Prokurorluğunun təqdim etdiyi sənədlərə Azərbaycan Baş Prokurorluğunda baxır.

Rusiyanın sorğusu əsasında Bakıda saxlanılmış Yelena Xaxaleva azad edilib

Fevralın 4-də Bakı Apellyasiya Məhkəməsi rusiyalı keçmiş hakim, Rusiya Prokurorluğunun vəsatətilə Azərbaycanda həbs edilmiş Yelena Xaxalevanı həbsdən azad edib.

Xaxalevanın azad edildiyini onun vəkili Şəhla Hümbətova bildirib. Belə ki, o, həbs qətimkan tədbirinin dəyişdirilməsi barədə apellyasiya şikayəti verib.

"Fevralın 4-də Apellyasiya Məhkəməsi Yelena Xaxalevanın azad edilməsi barədə qərar qəbul edib. Sonra biz bəzi sənədlərin hazırlanması üçün prokurorluğa getdik", - vəkil deyib.

Xatırladaq ki, Xaxaleva yanvarın 28-də Dubaya getmək istəyərkən Bakı hava limanında saxlanılıb.

Krasnodarlı keçmiş hakim Xaxaleva Rusiya hakimiyyəti tərəfindən beynəlxalq axtarışa verilib. O, Rusiyaya könüllü qayıtmaqdan imtina edərək ona qarşı təqibin siyasi motivli olduğunu bildirib.

Xaxaleva əvvəlcə Gürcüstanda, sonra isə Azərbaycanda müalicə olunub.

Xaxaleva 2021-ci ilin dekabrında Rusiyanı tərk edib və onun barəsində beynəlxalq axtarış elan edilib. 2022-ci ildə Rusiya məhkəməsi onun həbsinə qiyabi order verib. Xaxalevanın ekstradisiyası ilə bağlı Rusiyanın rəsmi tələbinin olub-olmadığı hələlik məlum deyil.

Rusiyada Yelena Xaxaleva dələduzluqda, vəzifə saxtakarlığında ittiham olunub. Onun barəsində cinayət işi 2021-ci ildə İstintaq Komitəsinin sədri Aleksandr Bastrıkinin tələbilə qaldırılıb.