İranla ABŞ arasında gedən danışıqların dalana dirəndiyi artıq aydın görünməyə başlayıb.

Bu şənbə Romada keçiriləcək üçüncü raunddan sonra yeni bir prosesin başlanacağına ümid azdır.

Ekspertlər bunu bir neçə səbəblə izah edirlər. Onlardan biri hər iki tərəfin təkliflərinin qarşılıqlı olaraq qəbul edilməməsidir. Belə ki, ABŞ İranda mövcud olan nüvə sənayesinə aid obyektlərin onların nəzarətinə verilməsini və AES-ləin zənginləşdirilmiş uranla təhcizatını da onlar tərəfindən təmin olunmasını istəyir. Tehran təbii ki, bununla razı deyil və sanksiyaların ləğvindən sonra anlaşa biləcəklərini vurğulayır.

Digər bir məsələ isə İranın bölgə dövlətlərinin silahlandırması ilə bağlıdır. Ötən gün ABŞ rəsmiləri bəyan ediblər ki, Yəməni aktiv silahlandıran İran bunun ağır şəkildə cavabını verəcək.

Vaşinqtonun bu açıqlamasına Tehranın reaksiyası gecikməyib. İran parlamentinin spikeri Məhəmməd Baqeri Qalibaf bəyan edib ki, əgər ABŞ hücum edərsə, onlar da analoji addımı atacaqlar. “İrana qarşı istənilən hücum barıt çəlləyinə od vurmaq kimi bir şey olacaq. Bu isə regionda dəhşətli partlayış deməkdir. Bölgədəki bütün Amerika bazaları İranın cavab zərbəsi ilə hədəfə alınacaq”.