Gürcüstanın baş naziri İrakli Kobaxidze bu ilin oktyabrında keçiriləcək yerli seçkiləri müşahidə etmək üçün ATƏT-in Demokratik Təsisatlar və İnsan Haqları Bürosunu (DTİHB) dəvət etməyəcəklərini açıqlayıb.

Kobaxidze bildirib ki, ATƏT/DTİHB müşahidəçilərinin yerli seçkilərə dəvət olunması “standart təcrübə” deyil və onların 2021-ci ildə iştirakını “istisna hal” kimi qiymətləndirib. O qeyd edib ki, həmin vaxt keçirilən seçkilər parlament seçkiləri ilə bağlı kontekstdə təşkil olunmuşdu.

“Yerli özünüidarə seçkiləri sağlam və lazımi şəraitdə keçiriləcək. Ona görə də bizim yerli seçkilərlə ATƏT/DTİHB-ni yükləmək həddindən artıq olardı”, – deyə baş nazir vurğulayıb.

Halbuki ATƏT 2006-cı ildən bəri yalnız 2014-cü il istisna olmaqla Gürcüstanda keçirilən bütün yerli seçkiləri müşahidə edib.

Kobaxidzenin bu bəyanatı Böyük Britaniyanın Tbilisidəki səfirliyinin Gürcüstan hökumətini ATƏT-i seçkilərə dəvət etməyə çağırmasından sonra səslənib. Səfirlik bildirib: “Gürcü xalqının istəkləyi demokratiya və azadlıqdır. Biz ümid edirik ki, Böyük Britaniya-Gürcüstan əməkdaşlığı, eləcə də Gürcüstanın Avropa institutları ilə əməkdaşlığı bu məqsədlərə töhfə verməyə davam edəcək.”

Bəyanatda həmçinin Britaniyanın Gürcüstanda vətəndaş cəmiyyəti qruplarını, seçicilərin maarifləndirilməsi təşəbbüslərini və yerli seçki müşahidə missiyalarını maliyyələşdirdiyi vurğulanıb: “Gürcüstan hökumətinin özü əvvəllər bu fəaliyyəti dəstəkləyib. Biz indi onun ‘təbliğat və ekstremizmi’ maliyyələşdirmək kimi təqdim olunmasını rədd edirik.”

Bu bəyanatlar Gürcüstanda oktyabrda keçiriləcək seçkilərin azad və ədalətli keçiriləcəyinə dair geniş ictimai şübhələrin fonunda verilir. Xüsusilə ötən il keçirilmiş parlament seçkiləri zamanı bir çox yerli müşahidəçi təşkilatlar və media qurumları səsvermə prosesində ciddi pozuntuların olduğunu sənədləşdirmişdilər.