İran parlamenti internet üzərində nəzarəti daha da sərtləşdirən yeni qanun qəbul edib. Yeni qanuna əsasən, internet məhdudiyyətlərini aşmaq məqsədilə VPN və digər texnologiyalardan istifadə edən şəxslər ağır cəzalara məruz qalacaqlar.

Tehran rejimi bu cür halları “milli təhlükəsizliyə təhdid” kimi qiymətləndirir. Qanunvericiliyə əsasən, məhdudiyyətləri aşmağa çalışan şəxsləri məhkəmə qərarı ilə cərimə, şallaq, iki ilə qədər həbs, bəzi hallarda isə “casusluq məqsədilə əməliyyat iştirakçılığı” kimi ittihamlarla ölüm cəzası belə gözləyə bilər.

İnsan haqları təşkilatları bu qanunu sərt şəkildə tənqid edir və onun İran xalqının müstəqil informasiya əldə etmək hüququnu pozduğunu bildirirlər. Yeni qanun, xüsusilə son illər baş verən kütləvi etirazlar və beynəlxalq təzyiqlər fonunda rejimin informasiya axınını total şəkildə nəzarət altına almaq istəyinin növbəti addımı kimi qiymətləndirilir.

İranın rəsmi orqanları isə bu addımı “kiber təhlükəsizliyin gücləndirilməsi” ilə əsaslandırır.

Xatırladaq ki, İran dünyada internetə ən sərt senzura tətbiq edən ölkələrdən biridir. Sosial şəbəkələrə giriş illərdir bloklanır, müstəqil media və informasiya resurslarına çıxış isə demək olar ki, mümkün deyil.