Suriyanın keçid dövrü Prezidenti Əhməd əş-Şara Azərbaycana səfəri zamanı İsrail rəsmiləri ilə bir neçə görüş keçirib. Bu barədə məlumatı İsrail mediası yayıb.

Məlumata görə, Prezident Şaraya yaxın mənbə iki və ya üç belə görüşün planlaşdırıldığını bildirib. Görüşlərdə əsas müzakirə mövzuları arasında Suriya və İsrail arasında təhlükəsizlik razılaşmaları, İranın regiondakı təsiri, Hizbullah və Fələstin silahlı qruplaşmalarının fəaliyyəti, eləcə də Livandakı Fələstin düşərgələri ilə bağlı məsələlər yer alıb.

Görüşlərin növbəti mərhələlərində Suriyanın xarici işlər naziri Əsəd əş-Şeybani və İsraillə təhlükəsizlik sahəsində danışıqlarda iştirak edən nümayəndə Əhməd əd-Dalatinin də iştirak edəcəyi gözlənilir.

İsrail nümayəndə heyətinə Baş nazir Benyamin Netanyahunun xüsusi nümayəndəsi, həmçinin təhlükəsizlik və hərbi strukturların yüksək rütbəli rəsmiləri daxildir.

Müzakirə edilən digər diqqətçəkən məsələ isə Dəməşqdə rəsmi diplomatik statusu olmayan İsrail koordinasiya ofisinin açılması imkanlarıdır. Bu təşəbbüsün reallaşması tərəflər arasında münasibətlərin yeni mərhələyə keçməsi kimi qiymətləndirilə bilər.