Moskvanın ən iri ticarət mərkəzlərindən biri olan “Food City” bazarında çalışanlara mümkün basqınla bağlı xəbərdarlıq olunub.

Gununsesi.info-nun əldə etdiyi məlumata görə, bazarda çalışan azərbaycanlılardan biri bildirib ki, bu barədə onlara bazar administrasiyası tərəfindən məlumat verilib. Məlumatda qeyd olunur ki, sənədləri qaydasında olmayan şəxslərin bir müddət bazara gəlməməsi tövsiyə olunub.

Xəbərdarlığın səbəbləri açıqlanmasa da, ehtimal olunur ki, bu, hüquq-mühafizə orqanlarının yaxın günlərdə keçirməyi planlaşdırdığı yoxlamalar və ya reydlərlə bağlıdır.

Bazarda çalışan soydaşlarımızın sözlərinə görə, Rusiya-Ukrayna müharibəsi başlayandan sonra “Food City”də rus ordusuna dəstək məqsədilə ianə kampaniyası təşkil olunub. Bildirilir ki, kampaniya bazarın əsas sahibi olan Qod Nisanovun təşəbbüsü ilə həyata keçirilib və bu müddət ərzində milyonlarla rubl vəsait toplanaraq Rusiya ordusuna köçürülüb.

“Əsas vəsait Qod Nisanova məxsus olsa da, burada çalışan azərbaycanlılar olaraq biz də həmin kampaniyaya dəstək verdik”, – deyə bazarda çalışanlardan biri qeyd edib.

Hazırkı vəziyyətdən narahat olan azərbaycanlılar Qod Nisanov və digər azərbaycanlı iş adamı İlham Rəhimovdan dəstək gözlədiklərini bildiriblər.