Rusiya Federasiyası Azərbaycan diasporunun Moskva vilayəti üzrə rəhbəri Elşən İbrahimovu ölkədən deportasiya edib. O, bu gün Moskvanın Şeremetyevo Beynəlxalq Hava Limanından “Aeroflot” aviaşirkətinə məxsus reyslə Bakıya göndərilib.

Rusiya hakimiyyəti İbrahimovu iyunun 18-də vətəndaşlıqdan məhrum edib. Rəsmi məlumatlara görə, bu qərarın əsas səbəbi onun “Rusiya Federasiyasının milli təhlükəsizliyinə təhlükə yaradan fəaliyyətlərdə” iştirak etməsi olub. Bu qərardan dərhal sonra Elşən İbrahimovun pasportu əlindən alınıb və o, müvəqqəti saxlama məntəqəsinə yerləşdirilib.

Deportasiya qərarı İbrahimovun hüquq-mühafizə orqanlarına təhvil verilməsi və Rusiyanı tərk etməsi ilə nəticələnib. Onun Azərbaycana qayıtdıqdan sonra məsələ ilə bağlı geniş açıqlama verəcəyi gözlənilir.

Qeyd edək ki, bu hadisə son vaxtlar Rusiyada azərbaycanlı miqrantlara qarşı həyata keçirilən sərt tədbirlərin fonunda baş verir. Xüsusilə Yekaterinburqda baş verən hadisələrdən sonra Azərbaycan və Rusiya arasında diaspor məsələləri və hüquq-mühafizə orqanlarının fəaliyyəti geniş müzakirə olunur.

Hazırda Elşən İbrahimovun Azərbaycana qayıtdığı təsdiqlənib. O, deportasiya qərarını hələlik şərh etməyib.