ABŞ Cənubi Qafqazda sülh və sabitliyi təşviq etmək məqsədilə Ermənistan və Azərbaycan arasında planlaşdırılan Zəngəzur dəhlizinə nəzarəti üzərinə götürməyi təklif edib. Bu barədə ABŞ-ın Türkiyədəki səfiri Tom Barrak Nyu-Yorkda keçirilən brifinq zamanı məlumat verib.

Diplomatın sözlərinə görə, Vaşinqton uzun illərdir həll olunmayan və hazırda 32 kilometr uzunluğunda olan yol üzərində cərəyan edən mübahisəni aradan qaldırmaq üçün konkret addım atmağa hazırdır.

“Onlar 32 kilometr yol üzərində mübahisə edirlər, lakin bu, əhəmiyyətsiz məsələ deyil. Bu, on illərdir ki, davam edir. Amerika isə deyir: ‘Yaxşı, biz onu təhvil alırıq. Bizə yüz illik icarəyə bu yolu verin və hər kəs bu yoldan istifadə edə bilsin’,” – deyə Barrak bildirib.

O qeyd edib ki, ABŞ-ın bu təklifi regionda davamlı nəqliyyat əlaqələrinin qurulmasına və tərəflər arasında etimadın bərpasına töhfə verə bilər.

Hazırda Ermənistan və Azərbaycan arasında Zəngəzur dəhlizinə dair razılıq əldə olunmayıb. Rəsmi Bakı dəhlizin Azərbaycanı Naxçıvanla birləşdirəcək bir yol kimi fəaliyyət göstərməsini tələb edir, İrəvan isə bu yolun öz suverenliyi altında qalmasında israr edir.

ABŞ-ın təklifi rəsmi şəkildə təsdiqlənməsə də, bu təşəbbüs Cənubi Qafqazda beynəlxalq vasitəçiliyin yeni mərhələyə qədəm qoyduğunu göstərə bilər.