Vəkillər Kollegiyasının sədri Anar Bağırov bəzi vəkillərin sosial şəbəkələrdə məhkəmə proseslərini ictimai müzakirəyə çıxarması ilə bağlı açıqlama verib. O bildirib ki, bu cür hallarla bağlı dəfələrlə xəbərdarlıqlar edilsə də, artıq daha sərt tədbirlərin görülməsi zərurəti yaranıb.

Sədr vurğulayıb ki, belə hallar bəzən məhkəmə hakimiyyətini lağa qoymaq, böhtan xarakterli və subyektiv fikirlərin yayılması ilə nəticələnir. Anar Bağırov qeyd edib: “Mən istəməzdim ki, məhkəmə hakimləri arasında vəkillər haqqında belə bir fikir formalaşsın ki, vəkillər məhkəmə proseslərini manipulyasiya edir. Biz azad peşə sahibləriyik və peşə azadlığını qorumaq üçün məsuliyyətli davranmalıyıq.”

Onun sözlərinə görə, bəzi vəkillər məhkəmə və digər dövlət qurumları barədə əsassız və bəzən həqiqətə uyğun olmayan fikirlər paylaşır ki, bu da təhqir və böhtan kimi qiymətləndirilə bilər. Bu kimi hallarla bağlı intizam tədbirlərinin görüləcəyi bildirilib.

Anar Bağırov əlavə edib ki, bu halların bütün vəkillərə aid edilməməsinə baxmayaraq, onlar Vəkillər Kollegiyasının diqqət mərkəzindədir və müvafiq məsuliyyət tədbirləri tətbiq olunacaq.

Sədr həmçinin vəkillərin artan sayı fonunda bu cür neqativ halların qarşısı alınmazsa, Vəkillər Kollegiyasının məhkəmə sistemindəki rolu və nüfuzu zədələnə bilər deyə xəbərdarlıq edib: “Biz belə bir mənzərə ilə razılaşa bilmərik və bu istiqamətdə ciddi nəzarət tədbirləri görüləcək. Unutmayaq ki, hər bir vəkil bütün Azərbaycan vəkilliyini təmsil edir. Bir vəkilin səhv addımı bütün Kollegiyanın və cəmiyyətin vəkillik peşəsinə olan münasibətinə zərər vura bilər.”

Sonda Anar Bağırov bildirib ki, cəmiyyətin vəkillik institutuna olan inamı və münasibəti, birbaşa vəkillərin şəxsi davranışları və ictimai çıxışları ilə formalaşır.