İran prezidenti Məsud Pezeşkian Azərbaycanla Naxçıvanı birləşdirəcək və Ermənistan ərazisindən keçəcək “Zəngəzur dəhlizi” ilə bağlı ölkəsinin mövqeyini açıqlayıb.

Avqustun 10-da jurnalistlərə danışan Pezeşkian bildirib ki, məsələ ilə bağlı İranın əsas tələbləri təmin olunub:

“Əlbəttə, bu dəhliz xəbərlərdə şişirdildiyi kimi deyil. İran İslam Respublikasının nəzərdə tutduğu ərazi bütövlüyünün qorunması, Avropa ilə əlaqənin qurulması və şimal ilə əlaqənin kəsilməməsi çərçivəsi bu məsələdə təmin olunub”.

Pezeşkian əlavə edib ki, yeganə narahatlıq, layihəni bir erməni şirkəti ilə yanaşı bir amerikalı şirkətin icra etmək istəməsidir.

İran xarici işlər naziri Abbas Araqçı da ABŞ şirkətinin tikintidə mümkün iştirakı ilə bağlı narahatlıq ifadə edib və məsələnin Ermənistan və Azərbaycan rəsmiləri ilə müzakirə olunduğunu açıqlayıb.

Araqçının sözlərinə görə, avqustun 11-də İran və Ermənistan xarici işlər nazirləri arasında telefon danışığı baş tutacaq, avqustun 12-də isə Ermənistan xarici işlər nazirinin müavini Tehrana səfər edəcək.

Azərbaycan və Ermənistan rəsmiləri avqustun 8-də Vaşinqtonda keçirilən görüşdə sülh sazişi layihəsinin mətnini paraflayıblar. Sənəd iki ölkə arasında dövlətlərarası münasibətlərin qurulması və sülhün təmin olunmasını nəzərdə tutur.