İran hökumətinin sözçüsü Fatimə Mühacirani Vaşinqtonda Azərbaycan, Ermənistan və ABŞ arasında imzalanmış Zəngəzur dəhlizi (“Tramp yolu”) razılaşmasına dair mövqeyini açıqlayıb.

“Azad İran” Teleqram kanalının məlumatına görə, Mühacirani mətbuat konfransına İran, Azərbaycan və Ermənistan sərhədlərini əks etdirən xəritə ilə çıxıb. O bildirib ki, Zəngəzur dəhlizi adlanan ərazi İran-Ermənistan sərhəd xəttinin yalnız kiçik bir hissəsini əhatə edir.

Sözçünün sözlərinə görə, İran üçün əsas prioritet bölgədə sabitliyin təmin olunması, dövlətlərin ərazi bütövlüyünün qorunması və suverenliklərinin pozulmamasıdır:

“Xarici aktorların bölgəyə müdaxiləsi bizi narahat edir və bu prosesləri yaxından izləyirik”.

Mühacirani əlavə edib ki, İran XİN məsələ ilə bağlı diplomatik izahatlar təqdim edib və mövzu mediada reallıqdan fərqli şəkildə təqdim olunur:

“Media bunu elə göstərir ki, sanki İran bütün şimal sərhədini itirib. Əslində bu, bizim üçün ciddi sərhəd itkisi anlamına gəlmir”.