Rusiyanın Korrupsiyaya qarşı Mübarizə üzrə Milli Komitəsinin sədri, Prezident yanında Vətəndaş Cəmiyyəti və İnsan Haqları Şurasının üzvü Kirill Kabanov Rusiyada yerləşən Heydər Əliyev abidələrinin sökülməsinə çağırıb.

Məlumata görə, Kabanov bu fikirləri Teleqram kanalında yazıb. Onun sözlərinə görə, Azərbaycan artıq Rusiya ilə “dostluq” münasibətini davam etdirmir və əsas tərəfdaşlarını Türkiyə, ABŞ, Böyük Britaniya və Ukrayna kimi görür.

“Mənə elə gəlir ki, kimin Rusiyanın dostu, kimin düşməni olduğu artıq tam aydındır. Azərbaycan artıq Rusiya ilə ‘dostluq’ oynamağa belə cəhd etmir. Hazırkı Azərbaycanın əsl dost və müttəfiqləri Türkiyə, ABŞ, Böyük Britaniya və Ukraynadır. Bu, əladır. İndi biz Ukraynadakı Azərbaycan neft məntəqələrinə hədəfli zərbələrin sayını artırmalı, onların Rusiyadakı mütəşəkkil cinayətkar diasporlarının bütün bizneslərini tamamilə bağlamalı və nəhayət, ölkəmizin ərazisində Heydər Əliyevin abidələrini yığışdırmalıyıq”, – Kabanov qeyd edib.

Onun bu açıqlamaları Ukraynada Azərbaycan Dövlət Neft Şirkətinə (SOCAR) məxsus yanacaqdoldurma məntəqəsinin məqsədli şəkildə vurulması faktını da dolayısı ilə təsdiqləyir.