Rusiya, Ermənistanın lazım bildiyi halda Azərbaycanla “Tramp yolu” adlı nəqliyyat dəhlizi yaratmaq planlarını dəstəkləyəcəyini açıqlayıb. Bu barədə Rusiya baş nazirinin müavini Aleksey Overçuk jurnalistlərə məlumat verib.

“Ermənistan bizim strateji müttəfiqimizdir və əgər Ermənistan nəyinsə onlar üçün yaxşı olduğunu düşünürsə, təbii ki, biz burada Ermənistanı dəstəkləyirik”, – Overçuk bildirib. Onun sözlərinə görə, bəyannamənin Vaşinqtonda imzalanması daha böyük təhlükəsizlik təminatları yaradır və bu, Cənubi Qafqazda sülh proseslərinə də müsbət təsir göstərir.

Overçuk əlavə edib ki, bu təşəbbüs Rusiya Federasiyasının maraqlarına “tamamilə uyğundur”.

Ermənistanın baş naziri Nikol Paşinyan isə “Fox News”a açıqlamasında, Vaşinqtonda Ermənistan, Azərbaycan və ABŞ arasında imzalanan bəyannamənin Rusiya və İran üçün də nəzərəçarpacaq faydalar gətirəcəyini deyib.

Rusiya Xarici İşlər Nazirliyinin rəsmisi Aleksey Fadeyev isə Moskvanın “Trampın beynəlxalq sülh və firavanlığa aparan yolu” adlanan dəhliz layihəsinin təfərrüatlarını öyrənəcəyini bildirib.