Rusiya ötən gecə Ukraynanın 14 bölgəsinə kütləvi hücum həyata keçirib. Bunun fonunda Ukrayna tərəfi Rusiyanın bir neçə neft emalı zavoduna zərbə endirib.

Ukraynanın cənubundakı Zaporojye bölgəsində bir qadın həlak olub, azı 30 nəfər, o cümlədən uşaqlar yaralanıb.

Prezident Volodimir Zelenski bildirib ki, Rusiya bir gecədə təxminən 540 dron və 45 raket buraxıb. O, Moskvanın bu hücumlarına cavab olaraq Rusiyaya qarşı yeni və sərt sanksiyaların tətbiqini tələb edib.

Rusiya Müdafiə Nazirliyi isə hücum zamanı “bütün hədəflərin vurulduğunu” açıqlayıb. Lakin bu iddia müstəqil mənbələr tərəfindən təsdiqlənməyib.

Hücumlar Dnepropetrovsk bölgəsində də davam edib. Rəsmi məlumatlara görə, Dnepr şəhərində bir yaşayış binası tamamilə dağılıb, ticarət mərkəzinə ciddi ziyan dəyib. Gecə hücumlarında ölən olmayıb, lakin daha sonra Rusiya dron zərbəsi nəticəsində 4 nəfər yaralanıb.

Qeyd edək ki, bu, Dnepropetrovsk bölgəsinə ardıcıl ikinci gecə hücumdur. Həftə əvvəl isə Kyiv müharibə başlayandan bəri ən iri hava zərbələrindən birinə məruz qalmış, azı 25 nəfər həlak olmuşdu.

Rusiya 2022-ci ilin fevralında Ukraynaya qarşı genişmiqyaslı işğala başlamışdı.