Avropada Təhlükəsizlik və Əməkdaşlıq Təşkilatının (ATƏT) Nazirlər Şurası Dağlıq Qarabağ münaqişəsinin həllinə məsul olan Minsk Qrupunun fəaliyyətinə son qoyub.

Qərar Azərbaycan və Ermənistanın birgə müraciəti əsasında qəbul olunub. ATƏT-in fəaliyyətdə olan sədri Elina Valtonen və baş katibi Feridun Sinirlioğlu sentyabrın 1-də yaydıqları bəyanatda bu addımı “tarixi hadisə” adlandırıblar.

“Azərbaycan və Ermənistanın sülh və münasibətlərin normallaşdırılması istiqamətində əldə etdikləri razılaşmaları alqışlayıram. Bu, diplomatiyanın gücünü göstərir,” – Valtonen bildirib.

Sinirlioğlu isə qeyd edib ki, tərəflərin konsensusa gəlməsi uzun illər davam edən etimadsızlığın aradan qaldırılması baxımından mühüm dönüş nöqtəsidir.

ATƏT-in açıqlamasına görə, Minsk Qrupunun bağlanması ilə bağlı yalnız inzibati funksiyalar – aktivlərin və avadanlıqların təhvil verilməsi – davam etdiriləcək və proses 2025-ci ilin 1 dekabrına qədər yekunlaşdırılacaq.

Xatırladaq ki, Minsk Qrupu 1992-ci ildə yaradılmış, Fransa, Rusiya və ABŞ həmsədr dövlətlər olmuşdu. Qurum 2020-ci ildəki İkinci Qarabağ müharibəsinədək əsas danışıqlar platforması sayılırdı. Azərbaycan Prezidenti İlham Əliyev dəfələrlə Minsk Qrupunu fəaliyyətsizlikdə ittiham edərək onun ləğvini sülh müqaviləsinin şərtlərindən biri kimi irəli sürmüşdü.

Azərbaycan və Ermənistan arasında sülh müqaviləsinin mətni bu ilin martında razılaşdırılıb, avqustun 8-də isə Vaşinqtonda paraflanıb. Sənəd hələ imzalanmayıb.