Avropa Komissiyası Rusiyaya qarşı 19-cu sanksiyalar paketini təsdiq edib. Komissiya rəhbəri Ursula fon der Lyayenin sözlərinə görə, yeni siyahıya Rusiyanın “kölgə donanması”ndan 118 gəmi də daxil edilib. Bununla da Aİ sanksiyalarına məruz qalan Rusiya gəmilərinin sayı 560-ı keçib.

Yeni məhdudiyyətlər paketinə kriptovalyuta əməliyyatlarının və xüsusi iqtisadi zonalarda qeydiyyatdan keçmiş şirkətlərlə əməkdaşlığın qadağan olunması, eləcə də Rusiyanın “Mir” ödəniş sisteminə qarşı tədbirlər daxildir.

Sanksiyaların qüvvəyə minməsi üçün Avropa İttifaqı əvvəllər bu addımlara qarşı çıxan Macarıstan və Slovakiyanın potensial vetosunu aradan qaldırmalıdır. Bu məqsədlə, Komissiya 2022-ci ildə dondurulmuş fondlardan Macarıstana ayrılmış 550 milyon avroluq subsidiyaların ləğvini nəzərdə tutur.

Fon der Lyayen bildirib ki, Rusiyanın mədən yanacaq gəlirləri Ukraynadakı müharibəni maliyyələşdirir:
“Buna son qoymaq üçün Komissiya Rusiyadan qalıq yanacaq idxalından imtinanın sürətləndirilməsini təklif edəcək”.

Hazırda Aİ Rusiyadan dəniz yolu ilə xam neft idxalına qadağa tətbiq edib və qiymət tavanını 47,60 dollar/barel həcmində müəyyənləşdirib. İttifaqın əvvəlki planına əsasən, 2028-ci ilin əvvəlindən Rusiya neft və qazının tam idxalı dayandırılacaq.

Bundan əlavə, Estoniya 2026-cı il yanvarın 1-dən Rusiyanın mayeləşdirilmiş təbii qazının (LNG) idxalını qadağan edəcəyini açıqlayıb. Xarici işlər naziri Marqus Tsahkna vurğulayıb ki, Rusiya öz ambisiyalarından geri çəkilməyib və qlobal təhlükəsizliyə təhdid yaradır:
“Biz onun hərbi maşınını qidalandıran gəlirləri azaltmağın yollarını tapacağıq”, – deyə nazir bəyan edib.