İş adamı Adnan Əhmədzadənin həbsi ilə bağlı yeni detallar üzə çıxır. Hadisə Azərbaycan Dövlət Neft Şirkətinə (SOCAR) həm maliyyə, həm də imic baxımından ciddi zərbə vurub.

İqtisadçı ekspert Natiq Cəfərlinin sözlərinə görə, dövlətə məxsus obyektlərdə belə qanunsuz addımların atılması ciddi suallar doğurur:

“Əgər bir nəfər belə işlər görə bilirsə, deməli, laboratoriyalar lazımi qaydada işləməyib, analizlər aparılmayıb və problem vaxtında aşkarlanmayıb. Bu məsələ mütləq araşdırılmalı, məsul şəxslərin çevrəsi müəyyən edilməlidir”, – deyə ekspert bildirib.

Natiq Cəfərli qeyd edib ki, hadisə Azərbaycanın enerji tərəfdaşı kimi illərlə formalaşmış müsbət imicinə xələl gətirib:

“Azərbaycan onillərdir ki, verdiyi sözü yerinə yetirən etibarlı enerji tərəfdaşı kimi tanınır. Təəssüf ki, indi SOCAR-ın təmiz imici zədələndi. Rumıniya və İtaliyanın bir neçə neftayırma zavodu müvəqqəti olaraq Azərbaycan neftindən imtina etdi, Qazaxıstan isə iki aya yaxın tranziti dayandırdı. Bundan sonra “Azəri Layt” markalı neftin daha sərt sertifikatlaşdırılması tələb olunacaq ki, bu da əlavə xərclərə səbəb olacaq”.

Maddi ziyana gəlincə, ekspert dəqiq rəqəmin istintaq nəticəsində məlum olacağını vurğulasa da, beynəlxalq mediada yayılan məlumatlara görə SOCAR-ın təxminən 450–500 milyon dollar itki ilə üzləşdiyi qeyd olunur.