BMT Baş Assambleyasının 80-ci sessiyası çərçivəsində Ermənistanın xarici işlər naziri Ararat Mirzoyan G20 nazirlərinin görüşündə çıxış edib. Bu barədə Ermənistan Xarici İşlər Nazirliyi məlumat yayıb.

Nazir nitqində Ermənistan-Azərbaycan sülh prosesinə toxunaraq ABŞ-ın vasitəçiliyi ilə əldə olunan razılaşmaları vurğulayıb:

“Sülh olmadan davamlı inkişaf mümkün deyil. Keçən il məhz bu zalda çıxışımda Ermənistanın regionumuzda sülhün təşviqinə sarsılmaz sadiqliyini vurğulamışdım. Bu gün, avqustun 8-də Vaşinqtonda keçirilən uğurlu üçtərəfli görüşdən və Ermənistanla Azərbaycan arasında sülh sazişinin paraflanması ilə əldə edilmiş tarixi mərhələnin ardınca bəyan edirəm ki, artıq sülh bərqərar olub”, – Mirzoyan deyib.

O, həmçinin Ermənistanın irəli sürdüyü “Sülhün kəsişməsi” təşəbbüsündən danışıb. Nazir bildirib ki, bu təşəbbüs qonşularla və regionla əlaqələrin gücləndirilməsini, nəqliyyat və ticarət marşrutlarının açılmasını hədəfləyir:

“ABŞ, Ermənistan və Azərbaycan tərəfindən Birgə Bəyannamənin imzalanması ilə biz suverenlik, ərazi bütövlüyü, sərhədlərin toxunulmazlığı və yurisdiksiya barədə fundamental prinsiplərdə razılığa gəldik. Hazırda həmin prinsipləri həyata keçirmək üçün texniki həllər üzərində işləyirik. Nəqliyyat əlaqələrinin tam açılması regionun tranzit və ticarət potensialının reallaşmasına imkan verəcək”, – nazir qeyd edib.

Mirzoyan əlavə edib ki, TRIPP qoşulma proqramı çərçivəsində nəzərdə tutulan layihələr dialoq və iqtisadi inkişaf üçün yeni imkanlar açacaq:
“Biz bu təşəbbüsü alqışlayan tərəfdaş ölkələrə təşəkkür edirik və G20 də daxil olmaqla, beynəlxalq ictimaiyyətin dəstəyinə ümid edirik”, – o vurğulayıb.